為了實現媽媽遺願，我成為了女兒國唐僧: K587

爸：「得唔得㗎，UO好迫夾㗎喎。」
我：「點會唔得，你個女我好窈窕㗎，上機瞓四個鐘乜都完啦，又唔使應酬啲黑面嘅空姐嘅。」
爸：「妳自己買到機票？我幫妳買UO都得嘅。」
我：「UO就咁買唔平㗎，要等佢特價嗰期先得，你等我自己買啦，我會諗到辦法嘅。」
爸：「咁又係，幽蘭屋企都會幫妳。」
我：「先唔使佢幫，一陣又話用公司里數幫我兌因航…總之我會安排時間嚟探你㗎喇，唔使擔心，你喺度有工返，生活應該都OK呀？人工唔會太低？」
爸：「唔會太低嘅，因為開working visa都要claim我係專業人士，而且我又有經驗，但係我而家唔敢落手做trade喇，朋友又驚我辛苦，就算我日文OK要帶日本人做嘢都係難，所以暫時係做下啲support嘢，有四五十萬円嘅，生活唔成問題，但而家日円低水唱做港紙會好蝕，所以我想儲下錢先，如果妳要生活費可以攞少少円返去…」
我：「唔使，我自己搞得掂，啲錢留返你東山再起啦。」
爸：「都一把年紀，重講乜東山再起，而且又無目標…」
我：「吖，係咪一無女人喺身邊就連錢都唔想搵喇？」




爸：「可以咁講嘅，喺度簡簡單單過下清幽生活都唔錯，其實我最想係照顧返妳嘅生活啫。」
我：「你唔使擔心我喺香港嘅生活，你顧掂自己先，到你喺度買到大屋我實過嚟俾你照顧㗎喎。」
爸：「哈…如果妳只係關心大細，去到山旮旯咁遠啲市就會有啲無人打理嘅舊屋，一球唔使就有。」
我：「即係揸車去超市要一粒鐘嗰啲？咪攪我。」
爸：「講笑啫…今晚陪我去秋葉原好唔好，東京嘅天氣開始涼，呢度得部舊式電暖爐，唔夠暖之餘好嘥電又好乾，想買部暖風機。」
我：「梗係得啦，你去邊我都會陪你去㗎，但你唔係年頭過嚟嘅咩，咁咪捱咗好耐？」
爸：「嗰陣我重係旅客，點會租到單位，月租民宿啲床位咋，免費冷暖氣供應又免水電其實都幾抵，不過而家出面重好曬，不如我哋睇套戲先？」
爹地用佢部電腦開咗套電影，當我諗緊會唔會係Minions啲朋友嘅時候，原來係一套日本嘅舊片，舊到我都唔知乜年代嗰啲，戲名叫刺青，講述一個富家女俾人陷害成為咗一個妓女，但佢好快就走出悲傷變成一個狠辣無情嘅妓女，題材比較偏激但表達手法唔算太cult，整體描寫尚算合理，亦無過份賣弄色情。全片當然係日文語音，配以英文字幕，爹地睇嗰陣無特別講啲乜，我亦唔質疑佢同我睇齣咁嘅戲嘅動機。