係同屋失友？定係同居勿友？只想同妳做普通朋友…🤦🏻‍♂️: K586

我：「呢度又唔係溫泉旅館…整唔到溫泉蛋㗎，全熟起碼唔會食到肚痛先，我諗係咁…」
爸：「感覺上似車仔麺多啲。」
我：「咁唔係幾好咩，等你可以食返香港嘅味道…」
爸：「嗯…嗯…啲麺腍得滯…」
我：「吓…係咩，我頭先試咗條重OK…咦，又好似真係腍得滯…呀，就算唔好食你都唔使食到喊呀…」
爸：「唔係呀，我係開心到喊…估唔到我淪落到咁嘅田地先有機會食到阿女整嘅嘢食…對上一次有女人煮飯俾我食，好似就係嗰個日本妹，不過佢都係唔識整。」
我：「人哋而家無可能唔識囉…我又唔係話唔肯整俾你食，咁以前你落樓下或者電話㩒幾㩒就有得食啦。」
爸：「以前樓下間拉麺都唔好食嘅…」
我：「我都覺得好麻麻，但就收得特別貴，我諗呢度是但一間拉麺鋪都好味過佢。」
爸：「咁又未必，東京多遊客，一樣有伏到喊㗎。」




我：「我呢碗唔係好伏咋？味道應該重可以？」我見佢無停過口，好快就食晒成碗麺，連湯都飲埋。
爸：「嗯，個味精湯幾好味。」
有時我都幾佩服交叉仔，雖然喺佢度無乜好嘢食，但夾（監）平夾賤炒碟咖喱魚蛋米粉出嚟我都覺得幾好食。
我：「哼，如果你咁唔滿意我都係唔好獻醜好啲。」
爸：「唔好呀，乖女！妳煮畀我我一定會食㗎！」
我：「呢啲簡單嘢要煮畀你食容乜易，但你都知道我無可能留喺度餐餐煮畀你食。」
爸：「如果妳有可能留喺度讀書，妳會唔會考慮？」
我：「吓？喺日本讀中學？」我聽到O咗嘴。
爸：「雖然我而家無乜錢，但好歹都係有正職同工作簽證，如果要申請妳做受養人過嚟生活都唔難嘅，加埋妳又未夠十八歲，應該好易就批。」
我：「但如果無錢讀國際學校，全部local school都係用日文教㗎喎，我相信我英文可以贏晒啲㗎仔，數學可能都勉強頂得住，但其他科呢？我會死硬㗎喎，以我僅有睇得明漢字嘅日文程度。」




爸：「咁又係，而且而家有幽蘭陪妳…咁大學呢？聽聞EJU都唔太難考，而且重有英文卷。」
我：「爹地呀…到時先算啦，東大唔易考㗎，日本五大得兩間喺東京，香港五大就搭巴士可以去勻晒，你有無諗過我喺香港飛過嚟所需嘅金錢同時間其實同喺大阪過嚟差唔多？」
爸：「唔係吖，新幹線都方便呀，萬四円到一程。」
我：「我都未同你講呀，唔好再買因航機票畀我喇，我又無嘢帶過嚟，又唔會喺度shopping，包個行李蝕晒喇，重有佢而家啲飛機餐好難食，你等我下次嚟自己搶UO機票就得，來回二千唔使，隨時平過大阪來回。」