係同屋失友？定係同居勿友？只想同妳做普通朋友…🤦🏻‍♂️: K585

我：「只要你無女人要養，其實就唔多使使錢嘅。」
爸：「差唔多啦，對唔住呀，係爹地照顧唔到妳。」
我：「富裕咗咁多年，我賺咗㗎喇，好在我開始大個。」
爸：「妳而家一定好刻苦…媽咪又唔理妳。」
我：「無所謂啦，無錢使反而少咗嘢煩，多咗時間做啲有意義嘅事，我先唔會學似媽咪咁淨係識洗腳唔抹腳。」
爸：「咁就好，千祈唔好俾物質同金錢控制住妳嘅生活，如果唔係妳會過得好慘。」
我：「你心水咁清又唔早啲同阿媽講？」
爸：「欸…啲女人都失控嘅，咁樣會好麻煩㗎喎，同埋當年嘅我…某程度上都俾佢某啲嘢控制緊。」
我：「你話你識媽咪嗰陣只係千萬富翁，但後來好似又唔止喎。」
爸：「佢咁大使，靠債券收息唔夠養佢㗎，於是我咪用蔗渣價買咗啲微軟，亞馬遜，Adobe，Apple，就係咁…」




我：「爹地你真係叻嘅啫。」
爸：「叻乜鬼吖，好彩㗎咋，英明一世都無乜用…」
以前喺屋企間屋好大，我哋一齊相處嘅時間唔係咁多，食完飯我就會匿返埋自己房，平時又唔會打攪佢做嘢，事到如今我哋竟然先有機會深入咁溝通下…然後唔知幾時我哋就一齊瞓著咗。
到咗第二朝我醒咗先，就決定行去超市望下。
爸：「咦，妳咁早喺度整緊乜呀？」應該係我嘈醒佢。
我：「整午餐食呀，自己煮可以慳返啲錢。」
爸：「妳唔係家政肥佬㗎咩，得唔得㗎？」
我：「實得呀！你唔好阻住我…快啲去刷牙洗面先！」
講就容易，呢度連個電磁爐都無，但我搵到個電蒸爐，只要攞開個架下面就可以當迷你煲用，學交叉仔講千祈唔好將啲嘢百鳥歸巢倒晒落去，首先淥熟啲菜先，其實呢個容器都唔允許我放多一樣嘢入去…然後火腿就放入微波爐度叮，重有…隻蛋應該幾時烚好呢？
好彩爹地聽話，刷完牙就坐咗喺度睇住我忙。




我：「嗱，有得食喇，無爆炸呀。」
爸：「嗯…望落個樣…係拉麺嚟。」佢個樣有啲疑惑。
我：「乜望落個樣，係真係拉麺嚟！呢啲拉麺香港好貴成五十蚊pack，呢度三百幾円咋，而家我唔使一千円就煮咗兩大碗拉麺出嚟！」
爸：「多謝…有好多菜…係菠菜嚟。」
我：「其實我都唔知係乜菜嚟，見平就買，自己煮就梗係食多啲菜啦，出面食得兩塊紫菜。」
爸：「係火腿…」
我：「叉焼難買吖嘛，火腿周度都有，將就食啦。」
爸：「重有全熟嘅烚蛋。」