為了實現媽媽遺願，我成為了女兒國唐僧: K584

我：「哎吔，你當我傻嘅咩，邊有咁易呃到我。」
爸：「但妳趕走晒佢哋都未必係好事嚟噃，妳知唔知呀，啲比較好嘅男仔通常廿歲多啲就俾人搶走㗎喇。」
我：「哎吔，我要識男仔容乜易呀，多多都有啦！」
爸：「咁又係，我對妳都好有信心。」
我：「咁你呢，重有無識到日本姨姨呀？」
爸：「無呀，一把年紀，重識女人嚟做乜喎。」
我：「咁你一個人喺度生活唔悶咩？」
爸：「都重可以嘅，返工會同同事交流下。」
我：「公司有無女同事㗎？」
爸：「邊有喎，我哋係做trading唔係做sales。」




我：「咁…重有無諗過要去六本木？」
爸：「有諗過下嘅…但係今時今日又點會再嘥無謂錢。」
我：「如果第時我搵到錢嘅話請你去玩吖。」
爸：「去嚟做乜，就嚟郁都郁唔到喇，得物無所用。」
我：「唔會喎，我覺得爹地你重好有活力呀，上樓梯重快過我，點會郁唔到呢。」
爸：「唉，都慣咗啦，已經好幾年無諗過呢啲嘢。」
我：「咁可能係你厭倦咗媽咪，唔想對住佢啫。」
爸：「唔好咁話佢啦，畢竟都一場夫妻。」
我：「咁佢而家都唔理你咯，就等我遲啲請你去六本木解下悶啦，我諗佢哋都會好歡迎你呢個客人，就算唔郁都可以去謦下欬，當有人服侍你沖涼嘅啫。」
爸：「妳真係…爹地唔想再做壞事喇。」




我：「邊係壞呢，你又唔會蝦佢哋嘅，我想你喺度過得開心啲咋嘛，不過我想問下，其實你一直都順順利利，點解會可以一日就輸晒副身家嘅。」
爸：「唔好提喇，因為我未係太習慣啲虛幣嘅波幅，其實我唔應該反手嘅，但最大問題係我唔知道個軟件啱啱更新完，個amount格仔可以入多咗一個零。」
我：「即係…好似啲護士餵藥睇錯咗mg同埋g，結果over咗一千倍整死咗個病人咁。」
爸：「妳可以咁理解，不過我無咁嚴重，只係十倍啫。」
我：「哦，原來呢個就係我成為悲慘美少女嘅原因。」
爸：「妳係咪好嬲爹地呀…」
我：「又唔會嘅，要嬲應該一早嬲咗你同媽咪佢亂咁嚟先，如果我成世唔使做就有錢使應該會好悶，而家嘅我感覺上充實咗好多…係呢，照計我個阿哥同家姐應該已經好大個，你又唔諗下搵佢哋幫手嘅。」
爸：「我又未至於去到要死嘅地步，唔會搵佢哋住喇，有前妻對佢哋精心教導佢兩個應該都好唔鍾意我，無謂畀麻煩佢哋啦，據我所知佢哋一個係醫生，一個係會計師，經濟上算唔錯嘅，不過美國稅率好高，佢哋又要建立自己嘅家庭，多餘錢唔會多得去邊，反而我前妻可能疊水好多，不過佢走嗰陣都無問過我攞一分一毫，我而家又邊好意思問佢攞錢吖，再者我又唔係特別高消費，你俾我手上攞住一萬，十萬，定係一百萬我可能都係咁生活。」