係同屋失友？定係同居勿友？只想同妳做普通朋友…🤦🏻‍♂️: K583

我：「哈，就算未犯錯，人哋仔女有直資讀，我都係讀津校咋。」
爸：「妳咁叻女，讀邊間學校都無問題啦，其實我一直叫妳媽咪搞，但佢懶理得理拖得就拖，直至派埋中學結果又唔算差，所以就由得妳嘞。」
我：「是但啦，咁我而家又真係讀得好開心嘅。」
爸：「淨係有幽蘭同妳一齊讀已經值回票價啦。」
我：「係嘅…就係因為佢我先唔使再理嗰個麻鬼煩嘅阿媽…」雖然我咁講好衰，但佢真係無好帶挈。
爸：「阿女，我希望妳唔好怪媽咪佢。」
我：「點解喎，咁多年嚟佢除咗識使錢同埋做啲唔見得光嘅嘢之外重識做乜，佢唔係對你好衰咩？」
爸：「爹地唔係傻嘅，佢做過啲乜我又點會唔知吖，但畢竟佢將最寶貴嘅十幾年青春畀咗我，到而家我已經無嘢可以再畀到佢，咁啱我又出事…正好…我都想妳幫我同佢講，佢而家自由㗎喇，所以想做乜就做乜啦，如果有任何文件要畀我簽，寄過嚟或者畀妳幫手帶嚟我簽就得。」
我：「你真係咁大方？」
爸：「如果妳接受到爹地以前嘅亂七八糟嘅話，就包容埋媽咪嘅自私自利啦，畢竟一開始就係我縱到佢咁，呢啲嘢有果就有因，無論點就係因為佢我先會有妳，而對我嚟講而家妳先係最重要嘅女人，可惜係我累埋妳…」




我：「無辦法啦，不過我大個女㗎喇，可以照顧自己。」
爸：「我又唔擔心妳嘅，我個寶貝女咁叻，但妳真係要幫下手睇住妳媽咪呀，佢好傻㗎咋，玩唔緊要，身邊係乜男人都唔係重點嚟，不過呢個世界好多人係黐線㗎，妳以為大無畏就乜都唔怕，我真係好驚佢出事。」
我：「欸…我叫佢小心啲啦，但唔覺得佢會理我。」
爸：「重有妳唔好學佢呀，一定要學識自給自足，唔可以靠男人嚟生活，如果唔係就會成世俾人控制。」
我：「放心啦，我已經決定咗唔會遺傳佢。」
爸：「但係妳就遺傳晒佢嘅美貌，有無男仔追妳呀。」
我：「咁…就…梗係有啦，不過俾我趕走晒嚕！」
爸：「做乜趕走晒人哋，妳唔想拍拖咩？」
我：「我要專心讀書吖嘛，佢哋會阻頭阻勢㗎。」
爸：「妳唔好呃爹地啦，係妳睇唔上眼咋掛？早啲識男仔都有好處㗎，可以令妳快啲學識點樣睇穿佢哋。」




我：「做乜喎，你好想我俾男仔呃咩？」
爸：「妳要知道，一個人要喺生命入面識到嘅第一個對像就係適合嘅機會率係好細㗎，好多時都會兜兜轉轉，俾一個男仔呃係無問題嘅，但妳唔可以俾一個男仔不停咁呃，亦唔可以俾第二個男仔用同一種方法呃，更加唔可以不停咁俾仔呃。」