係同屋失友？定係同居勿友？只想同妳做普通朋友…🤦🏻‍♂️: K582

爸：「都有嘅，但咁樣妳咪好慘囉，其實我喺度諗除非我下定決心同日本妹一齊，如果唔係我同佢遲早都玩完，因為我根本無可能長時間留喺呢邊，而喺香港…妳媽咪又真係好吸引嘅，雖然佢係傻咗啲，但我都唔想傷害一個得廿歲嘅女仔，而對我嚟講養多兩個人又唔係啲乜嘢大問題，要玩都玩過晒，咁喺香港身邊有個女人陪自己都唔錯嘅，所以就草草同佢簽紙，而佢亦都順理成章退學，而嗰次之後我就無自己一個人嚟過日本。」
我：「我媽咪唔慘，但個日本妹咪好慘囉？」
爸：「兩睇啦，呢啲嘢左右做人難，當時我專登寫咗封親筆信畀佢，感謝佢嗰年幾嘅陪伴，我唔會再返嚟搵佢，嗰個單位同埋我留喺度啲嘢就歸佢所有，叫佢好好生活，所以我諗唔會太差嘅，至少都擺脫咗賣肉生涯。」
我：「咁…你今次過嚟係想搵人哋再續前緣？」
爸：「傻嘅咩，十幾年無見人哋點會等我喎，佢早就結咗婚，有個仔讀緊小學喇。」
我：「你咁講會攪到我凝住有個細佬咁…」
爸：「咪亂講，我同佢已經再無任何關係。」
我：「咁你過嚟搵佢係為咗要返個單位？」
爸：「梗係唔會啦，男人講過嘅嘢一定要算數，只係當年我留咗一大堆嘢喺度，想睇下佢有無處理到，同埋關心下佢啫，我無晒聯絡佢嘅方法，唯一搵佢嘅線索就係嗰個單位，好好彩係佢雖然搬走咗，但就繼續持有嗰個物業而且出租咗畀對大學生情侶，輾轉之下終於搵到佢，原來佢同老公喺東京租咗一個肆正啲嘅單位住，睇到佢生活得唔錯我都覺得好安慰，而我當年留低嘅嘢，佢竟然原封不動咁keep起咗，由於唔識處理，佢都好歡迎我攞返走啲嘢。」
我：「嗰堆嘢好值錢嘅？」




爸：「少少咁啦，係啲日本威士忌同埋字畫嚟，嗰陣喺日本無聊得滯買嚟收藏，結果呢十幾年升咗十倍唔止，於是乎我今年就諗辦法拍賣啲貨，啱啱先清晒咋。」
我：「咁籌到幾多錢呀？」
爸：「唔少呀，有幾枝威士忌去到港子六位數，最後成批貨賣咗成兩球，交埋佣之後攞得返百五六粒。」
我：「既然係咁，你應該生活得幾好至係。」
爸：「無啦，我累到啲partner輸咗好多錢，所以九成嘅錢我都用嚟還返畀佢哋，再封封大利是畀個日本妹同佢個仔，我剩返三幾萬自己旁身咋。」
我：「吖，你都走咗過嚟避世，竟然重繼續還錢畀人？」
爸：「畢竟係我嘅失誤嚟…我攪到佢哋要按咗層樓，仔女本來讀緊直資中學要跳返出津校，所以好慘㗎，如果我唔做返少少嘢良心會過意唔去…」
我：「你對人哋咁好，咁你個女點算呀？」
爸：「我個女…真係我個女嚟，我犯錯，妳唯有硬食…」