為了實現媽媽遺願，我成為了女兒國唐僧: K581

爸：「合理消費啦，當時我撈底入咗一堆股票，幾個月都唔止呢個數嘅，而佢當然亦無得揀，決定跟住我先，點都好過每次返工對住唔同嘅人，頭一個月我哋都過得好開心，到咗第二個月我決定唔再租酒店，而用佢個名喺東京附近買一個單位一齊住。」
我：「原來沉咗船，成個單位送畀人添。」
爸：「少少咁啦，不過唔係值錢單位嚟，佢亦都唔想留喺東京市中心呢個酒色財氣嘅地方，所以我哋搬咗去遠少少嘅八王子度住，叫做清幽得嚟出入東京都方便，個單位其實同呢度相差唔太遠，係大一百呎到同有獨立廚房，當時市值大概一百萬左右，我亦鼓勵佢做返啲正常嘅工作，例如去麪包鋪打工咁，同一時間佢就教我日文，做返啲女人會做嘅嘢，當然都有畀家用佢。」
我：「咁幾好呀，做乜最後無一齊到嘅？」
爸：「嗰陣…啱啱先經歷完家庭破碎，我邊有心情建立另一個新家庭吖，呢啲嘢曾經有過咪算囉，個女仔都知我嘅大概情況，亦明白我想點，佢同意我哋互相照顧住先，我亦都同佢講如果識到戶好人家嘅話，到時就可以離開我，只要還返層樓畀我就可以嘞…我當時喺度嘅身份只係遊客，無可能長時間留喺度，所以每個月就要飛返一次香港或者其他國家，不過大概三個月之後日本入国局就開始留難我，但問題不大嘅，因為我有錢同埋有本地聯絡人，係每次入境都要入房謦半粒鐘先，呢個情況就係咁維持咗成年，嗰陣有個以前嘅partner搞新project想搵我返去香港幫手，我心諗如果再經常長期留喺度入国局唔知幾時會想攪我，所以都想平衡返多啲喺香港嘅時間，而且叫做有正常工作都比較易解釋，結果…妳媽咪當時讀緊year1走咗嚟我間公司度做intern。」
我：「啊，然後你就背叛日本嗰位姐姐。」
爸：「我當然唔係咁諗啦，不過妳知啦，妳媽咪都唔係做嘢嘅，最叻咪做埋啲唔正經嘢，嗰陣我心諗一個intern月薪幾千蚊咪由得佢，當請個靚女返嚟睇下囉，好快佢就識走過嚟黐飲黐食，當時我同佢講啱啱先離婚，同佢玩下就得，佢又真係肯同我玩，我心諗兩邊飛一邊一個咁都唔錯吖，幾好享受，反正我講明唔負責任。」
我：「即係原本嘅我係唔應該存在嘅…」
爸：「嗯，就係妳媽咪做我，佢同我講一直有食藥，但有次我喺日本返嚟佢同我講已經有咗兩個幾月…雖然佢堅持係啲藥失效或者有幾日唔記得食，但我諗無論點佢都係特登嘅，結果我就俾佢蹺起咗。」
我：「即係如果諗蠱惑嘢嗰個變成係日本妹，我就會係日本妹？」




爸：「都唔出奇㗎，雖然我唔知應該點計…」
我：「你無諗過企硬落咗我咩？」