thriXt Qantasy 純文字安眠之作 (New: - U2K - 一直上架): K580

爸：「當年有一段時間我真係無做嘢，自己一個人周圍去玩，由返大陸，到去東南亞，台灣，再到日韓，可以話乜都試過，嗰陣啲嘢好平，返深圳攞住兩三千已經好似做王帝咁，咁我一枝公又無家庭顧慮，所以就…」
我：「唔使解釋喎，男人有錢邊綁得住㗎，我明嘅。」
爸：「妳真係明…」
我：「明呀，人性都係咁，你又無對唔住邊個。」
爸：「但係妳千祈唔好識啲咁嘅男人喎…」
我：「呢啲你不如留返同我媽咪講好過啦…」
爸：「其實嗰陣我都唔細，重對住啲十七八歲嘅靚妹，諗返起都實在覺得慚愧…」
我：「都唔係嘅，因為爹地你有魅力啫。」
爸：「邊係吖，係錢作怪啫，後來我嚟到日本，我終於遇到一個令我心動嘅女仔，佢喺六本木返工嘅。」
我：「六本木…即係都係嗰啲女仔嚟？」




爸：「嗯，就係一個沖涼妹…」
我：「可以吸引到你，一定有佢嘅過人之處。」
爸：「佢係一個十九歲嘅女仔，外表同埋身材都好好…」
我：「有幾好，好唔好得過我先？」
爸：「咁…有我乖女嘅八成啦，佢喺家鄉秋田讀完高中就自己一個人嚟到東京，夢想係成為一個歌手，佢唱酒井法子啲歌好好聽㗎，而我都好鍾意酒井法子，不過妳知啦，夢想呢啲嘢邊有得強求，努力咗半年都搵唔到公司收留，當年未有KOL，亦唔係太興busking，佢唯有死死氣走去打工，生活好艱辛，家鄉屋企人對佢唔好，又俾男仔呃，結果為咗改善生活就認命去咗六本木。」
我：「真定假㗎，呢啲女仔個個嘅故事都差唔多咁。」
爸：「唔重要吖，重要嘅係佢都對我好好，我為咗見佢就攞定佢個時間表，佢每次開工我就約佢，到咗第三個禮拜嘅一日，我本來約咗佢放工前嘅time slot，但係佢就俾個大老細加鐘，連佢公司都唔敢推，啲黑衫人就好唔好意思咁塞現金券畀我，我見橫掂得返一個鐘唔夠咪索性喺度等佢放工囉，諗住請佢食宵夜，嗰陣我先知原來呢啲地方係嚴禁接放工，不過由於我係熟客佢哋都認得我，就俾我等到佢放工再由佢嚟決定，結果佢就出嚟搵我，本身淨係諗住同佢食嘢㗎咋，但佢就上咗嚟我酒店，而且唔收我錢…」
我：「人哋啱啱放工，然後同你…到底係乜感受…」
爸：「唔好嘅感受囉，不過講到底呢啲就係錢嘅關係。」
我：「不過佢肯上嚟搵你，應該都有啲冧你嘅。」




爸：「或多或少啦，同個熟客保持良好關係對佢嚟講又無壞嘅，我又唔係迫佢加班，到咗第二朝起身我就問佢有無賣斷，佢話佢係自由人身份兼職，亦都無爭人錢，所以我就攞咗一百萬円現金出嚟，問佢肯唔肯陪我一段時間。」
我：「嘩，有錢真係好。」
爸：「係㗎，錢喺大部份情況可以令人跪低。」
我：「百萬円，嗰陣應該係七萬幾港紙，唔算少喎，你咁樣燒錢法唔驚燒晒副身家咩？」