係同屋失友？定係同居勿友？只想同妳做普通朋友…🤦🏻‍♂️: K579

爸：「係嘅，呢個世代嘅女人真係好能幹…」
我：「其實我有個問題想問，點解你會過咗嚟日本嘅。」
爸：「呢樣嘢…乖女，我可唔可以拖住妳瞓覺呀？」
我：「可以嘅。」爹地係一個正常人嚟，我又唔驚佢會對我做啲乜嘅，只不過已經好多年無拖過佢，實在係有啲唔慣。
爸：「我過嚟日本除咗係為咗避風頭之外，重要搵人救我，即係都係為咗錢。」
我：「但係…咁多年嚟，我見你過嚟日本都係旅行啫，定係你想講就係畀到份工你嗰位朋友？」
爸：「唔係喇，其實喺妳出世之前，喺我識妳阿媽之前，我喺日本住過一段時間，大概係一年多啲。」
我：「吓…唔怪之得你啲日文可以咁叻啦。」
爸：「嗯，係呀，因為有個女人好用心咁教我…妳…會唔會怪爹地㗎？」
我：「怪你嚟做乜，我覺得由細到大你對我同媽咪都好好，以前嘅嘢又唔關我事。」




爸：「重記得嗰陣亞洲金融風暴再接住科網股爆破，成條街都愁雲慘霧，但係我就無事，兩次股災我都有沽貨反而重贏咗…不過我前妻啱啱話要同我離婚。」
我：「其實點解要離婚嘅？」
爸：「因為爹地曳囉，其實嗰陣我無諗住會整散頭家㗎，只係生活苦悶想搵啲嘢玩下，但佢知道咗之後就無情講，點勸都唔聽，硬頸到難以置信，就算我話不如繼續一齊生活到啲仔女成年先佢都話唔好，我無佢辦法。」
我：「又會咁有骨氣嘅，咪盞辛苦自己。」
爸：「嗯，因為佢係個女強人嚟，佢又唔使靠我生活，當時佢已經係big4 consultancy嘅sen man，為咗離開香港呢笪傷心地，佢同公司申請咗調職去美國，唯一要求就係唔准我同佢爭撫養權，一蚊都唔使我畀佢。」
我：「然後爹地你就自由自在喇。」
爸：「都可以咁講嘅，當時我攞住一筆錢，確實係諗住直接退休㗎喇，反正得一個人，慢慢搣到過世就算。」
我：「想問下嗰陣退休大概要有幾錢？」
爸：「嗰陣其實唔多，得個細單位同一千萬到嘅證券現金，的確唔可以話好富有。」
我：「咁就退休，夠使㗎嗱？」




爸：「妳有無聽馬雲講書呀，一個人最幸福就係每個月搵兩萬蚊，保持返有規律而低風險嘅生活，一直做自己想做嘅嘢享受生活，唔好好高騖遠…有無諗過呀，如果攞住一千萬，買下啲銀行股，公用股同債券，一年都有兩三厘息收，每個月就有成兩萬蚊，當年好好使㗎喇，甚至乎夠供樓添，就算而家揸住一千萬都勉強夠退休啦。」
我：「不過你好明顯就無咁做啦。」