thriXt Qantasy 純文字安眠之作 (New: - U2K - 一直上架): K577

而個差別，係完全超越咗日本用漢字所帶嚟嘅影響。
不過講真我對佢其實知之甚少，尤其係我出世前佢就已經活咗好耐，亦好少講佢以前啲嘢…
呢啲無成本嘅時間，最啱就係攞嚟寫下小說。
唔經唔覺就坐到日落，日本嘅秋天係快過香港天黑。
爸：「好！搞掂晒，嚟緊兩日都唔使再對住嚕！」
我：「你鍾意啦，無論點我都係星期日要走…」
爸：「咁…聽日同後日都可以帶妳去玩嘅，妳有無地方想去吖，例如迪士尼？」
我：「玩咩，都唔知去過三次定四次啦，你唔厭我都厭，而且又唔係平，做乜要嘥呢啲錢。」
爸：「嗯，咁使唔使買下啲衫褲鞋襪咁？」
我：「唔使喇，我有足夠嘅存貨喺度…我過嚟都係為咗睇下你啫，如果你本身有地方想去我就同你去，如果無嘅話留喺屋企休息下就得，東京我嚟過好多次啦，唔會話有乜地方唔去唔得。」




爸：「乖女…咁不如而家去超市行咯，呢度七點就特價…」
我：「無問題吖，睇你個樣都唔會自己煮㗎啦。」
爸：「對唔住呀，妳咁大個女都無煮過餐飯妳食。」
我：「哎，千祈唔好亂嚟…唔好話你，就連媽咪佢都無煮過，唔好搵我嚟做實驗…我哋出去搵啲平靚正便當。」
雖然呢度一啲都唔近地鐵站，但行兩分鐘就有超市，而且喺AEON旗下嘅迷你超市，叫做有少少親切感。
我：「你平時就係日日嚟呢度買嘢食？」
爸：「算係啦，因為真係好方便，重好平添。」然後佢就攞咗碗親子丼放入車，原價七百円變三百五，為返港子即係廿蚊唔使，交叉仔見到嘅話實開心死都似。
而我就攞咗一盒焼帶子壽司，一盒新香巻，重有炸雞塊，加埋都係六百幾円，一定平過香港；而呢度啲生果都有特價，隨手攞咗一包蘋果同士多啤梨就埋單走人。
返去叮一叮加熱，簡簡單單又一餐，唔知交叉仔個衰人食緊乜呢？最好餓死佢，等佢返到公司偷白飯食。
爸：「妳今朝搭早機應該唔夠瞓？食完飯快啲沖涼啦。」




喺呢啲地方住，真係好有生活嘅感覺，例如每次出街都例牌要行八層樓梯，去是但一個地鐵站又要再行多十分鐘，我唔知會唔會喺近啲嘅地方有巴士站，但本身喺日本搭巴士就係高難度嘅挑戰嚟…唔理，難得有浴缸好歹都浸下先，日本有樣嘢好就係再屈騭嘅地方都經常有浴缸。
爸：「妳浸耐啲唔係問題，記住留返啲水畀我呀。」
我當然知道成大缸熱水係要錢，但呢種感覺實在係有啲唔慣，不過呢度係日本嚟，好似父女一齊沖涼都係好平常嘅事，重會一家人一齊浸溫泉…所以我浸過嘅水呢…