為了實現媽媽遺願，我成為了女兒國唐僧: K576

我：「有瓦遮頭就得啦。」
爸：「不過呢度都有樣好，因為日本搭短途車好貴，只要你肯行嘅話，廿分鐘唔使就去到浅草、上野，同埋秋葉原，可以慳返好多錢。」
我：「又唔係嚟旅行，都唔會日日去嗰啲地方啦…」
車庫隔籬係一道鐵門，入密碼開門然後開始行樓梯，直至行到去最高四樓，一梯一伙一道木門…
爸：「多謝乖女嚟探我，呢度地方淺窄…」
我：「嘩！好似大雄間房咁。」
爸：「你形容得幾好，香港人應該會好唔慣。」
香港人唯一會慣嘅，應該就係得大細，呢度當然重細過交叉仔間公屋，大概啱啱二百呎唔夠，不過學嗰條仆街仔講，其實一條友住有張床同插蘇就搞掂…係喎，呢度連床都無，個廳中間有張四方形嘅木几，即係啲日本人攞嚟食柑嗰啲，近陽台一邊有張工作枱喺度，即係時光機嘅位置，另一邊就係開放式廚房咁，我眼見係有微波爐同水煲…可幸嘅係起碼有自己廁所同方形浴缸，而個地下呢，係畳畳米嚟，雖然有啲舊但踩落去都舒服。
陽台闊度得兩呎唔夠，啱啱好企到個人，雖然行四層樓係有啲辛苦，但起碼會靜少少，望出去除咗見到對面樓重會有少少天，斜角可以睇到東京天空樹嘅上半截。
爸：「妳坐下啦，我做埋少少嘢先。」然後佢就坐喺工作枱度用laptop開工…




呢度有張坐到兩個人嘅木凳，茶几上面放咗啲日本雜誌…
然後佢一做就做咗成粒鐘，總覺得…日子可以一直落去…
我：「爹地…你叫我飛過嚟就係睇你做嘢。」
爸：「呀…以前喺屋企都係咁樣啫，我覺得幾好…」
我：「你唔係鍾意匿喺書房咩，我鬼睇到你做嘢。」
爸：「間唔中都會走出嚟嘅…知妳喺度就會好舒服。」
我：「嗯…呢度電視都無。」
爸：「咁我又唔睇，有電視就要畀NHK稅，好唔抵㗎…不過呢度有wifi，妳上網乜都有得睇啦。」
我：「唔使喇，我都想個腦可以休息下。」
爸：「如果妳悶，可以行去浅草睇下，識返嚟就得。」




我：「唔喇，我留喺度陪你啦…不過，我見你重喺度睇緊bitcoin，唔係重炒緊呀？」
爸：「無錢買邊有得炒喎，我喺度整理緊外國啲新聞，轉返做日文畀啲日本投資者睇咋嘛。」爹地喺我嘅認知入面就係不停炒賣，我諗佢去到世界邊一個角落都離唔開呢行；不過有樣嘢我係一直都覺得好奇怪，佢由頭到尾都似係一個普通香港人，專業範疇同日本無乜關係，但佢嘅日文係出奇地好，以前成家人嚟日本基本上去到邊都唔會遇到問題，相反當媽咪一話要去韓國，就成件事會變得好麻煩，食餐飯都要打仗咁款。