係同屋失友？定係同居勿友？只想同妳做普通朋友…🤦🏻‍♂️: K575

爸：「唔好意思，阿女，難得妳嚟到無得帶妳食好嘢…」
我：「邊係喎，可以喺日本食拉麺就已經好開心。」
爸：「妳真係無所謂…唔會唔開心？」
我：「呢個世界每個人嘅生活方式都唔同㗎，如果要指定某種生活方式先開心嘅話，咁實唔開心㗎喎，就算琴日喺個天度飛，今日都可以喺水入面游，最緊要食得飽啫。」
爸：「妳識咁諗就好…」
差唔多成年無見佢，睇住佢食拉麺，發覺佢好似又老咗…我諗過到嚟生活應該唔簡單，可能做嘢都辛苦，始終佢已經唔後生，唔知重可以捱到幾耐…
我：「其實…點解咁遲先搵我嘅？」
爸：「咁我…無晒錢，諗住妳阿媽同妳都唔會想理我…妳跟住媽咪始終好少少嘅…」
我：「點會喎，媽咪佢就唔鬼知嘞，但你係我爹地嚟㗎嘛，就算你有無錢我都唔會唔理你㗎，如果可以…我想遲啲可以照顧返你…」
爸：「傻女嚟嘅，妳重有好多年書要讀㗎…我而家重可以搵到食嘅，妳媽咪佢照顧到妳吖嘛？」




我：「佢？！顧掂自己唔好麻煩到我就已經萬事大吉，我都唔係好想理佢…」
爸：「吓…咁妳而家點生活？」
我：「陰差陽錯之下，幽蘭轉咗嚟我間學校做我同班同學，所以…」無可奈何之下，我講咗個善意嘅大話，亦都可以話呢個唔係大話嚟，只係現實同理想有些少偏差…
爸：「呀…原來係咁，阿女妳好好彩可以喺細細個嗰陣識到呢個好朋友，佢屋企係好富有，妳而家重細個都可以受人恩惠嘅，但妳要記住唔好欠人哋呀，第時一定要還返畀人，千祈唔好濫用人哋嘅善心，要好好珍惜呢段關係…」
鬼唔知咩，呢個就係我最煩嘅地方嚟。
我：「知喇，我有幫人補習兼職，會好好努力…」
爸：「嗯，咁就好，但都要顧住自己啲成績呀，係呢，妳高中揀咗乜嘢科咁呀？」
我：「Phy，Chem，Econ，M1。」
爸：「幾好吖，係妳鍾意讀嘅科就得。」
其實由細到大我成績都唔錯，而且好平均，所以佢都無乜過問我嘅學業；反而係媽咪驚我成績唔夠好而亂咁幫我報補習班，咁我又無乜所謂嘅，當識下其他人咁囉。




我：「乜你都會關心我讀成點嘅咩？」
爸：「以前覺得妳係女仔，就算唔想做嘢都無乜所謂，我剩返畀妳嘅實夠妳用成世，但而家…唔得喇，妳要畀心機好好讀書，一定要照顧到自己。」
我：「放心啦，我無咁懶，我覺得我OK嘅。」
食完拉麺，我哋繼續沿住內街行返爹地屋企，距離車站越嚟越遠就連餐廳都開始唔見，取而代之嘅係一啲生活用品鋪，木工，單車維修，髮型屋，醫生咁，都幾罨耷下。
爸：「哈…呢度喺正三個地鐵站中間，所以好平租。」
行咗五分鐘有多終於嚟到目的地，喺我眼中呢度每條街都係一式一樣嘅矮大廈，如果唔mark喺地圖我諗我無可能搵得返呢度。一棟好窄又幾殘下嘅建築物，睇落有四層，有啲似香港嘅唐樓，但佢個底係一個好迷你嘅車庫，勉強咁塞咗一架貨車仔，重有電單車同單車…