為了實現媽媽遺願，我成為了女兒國唐僧: K574

的確，論同男仔拍拖我都可以算係專業掛，只要講幾句嘢就可以令到佢哋心花怒放，對我嚟講實在係易如反掌。唔係話佢哋唔好仔，只係咁樣一齊其實又有乜意義呢？如果食下飯收下禮物叫做意義嘅話咁咪有囉，當然喺男仔嘅mindset入面又係會有另一條意義線…
我望住登機證上面啲資料，每一個field都係填啱晒嘅，所以佢一定係我爹地嚟掛？或者你可能會問其實一個voice call咪可以確認到對方身份囉，但事實上我好似由出世到而家都未同過爹地講電話…以前佢經常性喺屋企開工，我反而成日想媽咪捉走佢出去玩等我自由自在。
我：『爹地呀，我聽日重要返學㗎！』
爸：『返少日無乜所謂啫，我聽日下晝攞半日假。』
其實機票都出咗，我重邊有得唔飛呀，一張機票大拿拿幾千蚊，點都緊要過返一日學，只不過好煩…
爸：『我買咗機鐵飛畀妳，妳識唔識出東京都呀，使唔使嚟接妳？』
我：『唔使喇，你畀個地址我就得，喺JR站附近㗎咋？』
其實無論成田定羽田我都去過好幾次，雖然未至於話認得晒啲路，但睇牌搭鐵出市區係無難度嘅…但消失幾日，就要掉低阿爽喺香港，重要求祈作個大話同條仔講。
X：「呢啲就係妳口中所講嘅社務？！」頂，點解佢會攞到張相㗎，係邊個死人頭forward畀佢，早知同佢講定…
結果我哋喺度鬧架…唔理你呀！衰人，你自己慢慢受啦！我較咗個四點幾嘅鬧鐘，好細聲嘅，當然唔會嘈醒個死人頭，然後摸黑執咗幾套衫，天未光就出門口…行上山搭N車去機場。




由細到大搭過好多次飛機，當然都試過要半夜出發或者返嚟嘅，所以唔覺得有乜特別；只係咁大個女第一次自己搭飛機，竟然唔係去旅行…雖然單單身處喺日本已經開心。
六點多啲去到機場check in，以為無成年人喺度會有啲麻煩，結果非常順暢咁出飛，而且我又無行李要寄艙；入埋禁區，以前可能要專登搵個lounge出嚟入去hea下，而家只需要慢慢咁行去登機閘等上機；七點幾就排隊上飛機，死人爽呢個時候應該差唔多夠鐘起身，等我轉做飛行模式同世界講再見，哼！
一個人搭飛機，原來感覺無乜特別，無咗媽咪捉住我周圍去睇手袋幾好，安靜咁上飛機再安靜咁瞓覺，係中途要食一個都幾難食嘅因航早餐，然後唔經唔覺十二點幾到咗日本。我唔知自己應唔應該感動好，總之就憑我嘅常識填表再排隊過關，爹地可能驚我一個細路女會俾人留難，所以就預先影定啲文件寄畀我，不過個關員揭咗一下我本護照見我嚟過幾次就乜都無問過我。