係同屋失友？定係同居勿友？只想同妳做普通朋友…🤦🏻‍♂️: K573

爸：『可唔可以唔好話畀媽咪知我搵過妳，我唔想佢亂諗。』
我：『無諗住要搵佢，況且佢自有佢諗法，有乜亂唔亂諗可言。』總之唔好煩到我就得。
睇落又唔似係白撞，但爹地無端端搵我係所為何事呢？呢對老竇老母都亂咁嚟嘅，叫我呢個做女嘅點適應你哋喎。
同佢漫無邊際咁chat咗下，就嚟到第二日。
瘟：「妳覺得，係咪由得佢哋兩個咁樣就好？」
我：「除非你好恨怕拖啦，又或者好鍾意佢哋是但其中一個，咁就快快脆脆結束拉鋸。」
瘟：「咁又無，一齊做friend玩都幾開心。」
我：「佢哋冧你就自然會對你好㗎啦，可以由得佢哋互相競爭下，咁嘅話你應該可以最開心，不過呢，佢哋中三㗎咋，有啲送上門如果做得太過份嘅話係會返唔到轉頭，我諗你明我講乜嘅，唔好因為一時衝動而揀錯呀。」
瘟：「我明嘅，不過睇嚟佢哋就無做呢啲類似嘢嘅打算，我諗佢哋都係重細個所以貪玩嘅啫。」
我：「佢哋兩個對住你咪算好囉，畀著其他男仔可能已經溶到佢哋渣都無得剩。」




瘟：「或者…因為我本身鍾意啲大個啲嘅女仔掛。」
爸：『乖女，我買咗聽朝飛東京機票喇，過嚟探下爹地啦。』附圖重有收據，登機證，QR code一大堆…
我：「嘩！有無攪錯？使唔使快到咁…」
瘟：「無乜事呀，見妳變晒樣咁嘅？」
我：「無…係啲屋企人又亂咁嚟啫，食飯先啦。」
瘟：「我…可唔可以同妳影幅相先？」
我：「可以嘅，影相啫，坐過嚟啦。」
一般男仔都會因為約到女神共進晚餐而相當興奮，如果可以順便打埋卡嘅話就更加係人生勝利組；唯獨係阿爽，因為安全關係佢好似同我一張合照都未影過，平時只有佢揸機幫我影，不過佢又無乜投訴。
瘟：「呢啲咁完美嘅女仔，妳話如果佢係單身嘅話不知幾咁好呢。」
我：「唔好咁多幻想啦，佢係單身就未必想拍拖㗎喇。」




瘟：「點可以咁大嘥，明明咁多男仔想愛惜佢。」
我：「幽蘭咪單身囉，你可以考慮下㗎。」
瘟：「佢畀人感覺太乖喇，我好似同佢唔係幾溝通到…」
我：「你即係掉轉槍頭話我曳嘅啫。」
瘟：「有少少曳先平衡，可以突顯出妳嘅可愛。」
我：「係咪又係乜嘢，女不壞，男不愛咁呀？」