係同屋失友？定係同居勿友？只想同妳做普通朋友…🤦🏻‍♂️: K572

我：「點會喎，我唔會俾妳要去做雞咁慘㗎…」
Q：「有時啲嘢話唔埋嘅，可能我媽咪俾人綁架呢。」
我：「總之無論點，我都會乖乖喺屋企等妳返嚟，然後服侍妳，但我一定會盡我所能保護妳㗎…」
Q：「嗱，係你講㗎，以後你就唔准管住晒，我鍾意溝幾多條仔都得，同佢哋喺出面做過乜你都唔准問。」
我：「唔問囉，不過咁樣妳會開心咩？」
Q：「或者你都可以話我知你曾經同Angel，Wendy佢哋玩咗啲乜嘅，我無問你唔代表唔想知嘅。」
我：「好，咁我以後都唔再問啲多餘嘢…但係呢幾日妳無返屋企係去咗邊呀，我好擔心妳呀…」
Q：「有少少事，過咗一轉日本啫，遲啲先再講啦，我哋再唔快啲返課室又全校都講我同你㗎喇。」
我：「吓！日本…」然後我就跟住佢一齊返課室。
Q：「唔好意思嚇親大家呀，個傻仔…以為我嬲咗佢所以唔返學，其實係我唔舒服啫，所以…無嘢喇。」




易：「真係得意，朝早重病，下晝又會好返都有。」
Q：「你下世做下女人咪明囉。」
數學先生一面無奈，然之後我哋就返埋位上堂，幽蘭個衰豬望住我笑，又用筆㧻我大髀…
※※※※※
『乖女，妳呢排…過得點呀？』
我：『嚴禁白撞，如要證明閣下並非機械人，請先存入銀碼為密碼的款項到小妹戶口，以方便進行認證服務。』
『要呃我個寶貝女都真係唔簡單…如果咁樣，妳肯信我係爹地未呀？』佢send咗幅自拍照過嚟。
我：『攞住幅相就可以認係屋企人，咁睇嚟我都可以過柬埔寨食大茶飯唔使讀書咯。』
『妳要點先肯信我係爹地呀…』
我：『有嘢就講啦，我都無錢俾你呃嘅。』




爸：『爹地好掛住妳呀，好想聽下妳把聲。』
我：『消失咗成年，咁樣叫好掛住我…』
爸：『因為我無面搵妳嘛…媽咪…佢點呀？』
我：『你應該比我更加瞭解呢個女人先係，唔好提佢…』
爸：『原來係咁…妳而家生活到嘛？』
我：『我識得照顧自己，你唔使太過擔心。』
爸：『妳係咪好嬲爹地呀？』
我：『你唔好提啲唔開心嘅嘢，我日子會過得更加好，係呢，見到你幅相，你而家喺日本？』
爸：『嗯，出事之後就過咗嚟，然後一直喺度避風頭…』
我：『定係一直喺度渡假呀…』




爸：『唔係呀，我有舊朋友喺日本做生意，佢安排咗份工畀我，而家都叫做勉強生活到。』
我：『生活到就好啦，我都無乜嘢可以幫到你…』