為了實現媽媽遺願，我成為了女兒國唐僧: K569

我：「妳真係唔理佢，由得佢喺出面乾等？」
鄧：「嗯，佢過一陣再唔走我叫校工開後門畀我算。」
我：「做錯嘢嗰個又唔係妳，使唔使咁驚佢呀？可以出去質問下佢，然後再兜巴車埋去㗎嘛。」
鄧：「我無咁無聊，就咁安安靜靜結束就最好，我好多嘢都唔想面對，等於你唔想見到考試卷咁。」
我：「都係嘅…其實我想問下，Queenie今日無返學件事…」佢唔會怕事到由得個學生學都唔返掛？
鄧：「我都覺得奇怪…係佢媽咪幫佢請假㗎，所以我無問你，見你全日好似唔知發生乜事咁…不過有乜事都唔好同我講，我理唔掂你哋啲嘢。」
我：「妳肯定嗰個係佢媽咪嚟？唔會係佢自己扮聲呀？」
鄧：「你當我係乜？雖然如果佢扮聲我應該會由得佢…」
我：「咁…我可唔可以問下佢因乜事請假？」
鄧：「呢啲係同學私隱嚟㗎，雖然私隱對你兩個嚟講有啲不切實際，但其實係我唔知，佢媽咪一打嚟就話幫阿女請事假，咁我實問乜嘢事㗎，跟住佢欸咗兩嘢就話阿女都係病咗，所以…唔通我審問佢媽咪咩。」




我：「原來係咁…唔該Miss，妳都要打起精神呀。」
知道咗係佢個離晒大譜嘅媽咪幫佢請假，咁都好啲，起碼唔係得QQ一個人離家出走，換言之佢去咗搵阿媽？唔係真係專登激我走去幫阿媽一齊服侍男人掛…雖然我知呢個組合好值租，由曳到爆嘅媽咪教曉乖女做人嘅道理。
No，No，No，我咁鍾意QQ係絕對唔可以性幻想佢媽咪…
返到屋企，又見到得返吉百利喺佢個秘密基地。
我：「點解你個主人咁衰㗎，離家出走都唔帶埋你嘅，我哋兩個…以後可能要相依為命喇。」
可惜我得到嘅回應係隻吉百利好串咁望住我，話有佢守喺個基地度就得喎，叫我快啲躝屍趌路。算，都係唔好攪佢張床，其實我覺得QQ根本就唔介意同我一齊瞓，只係唔鍾意我整污糟佢張床；甚至乎佢可能同我做愛都無所謂，只係介意我對佢唔好…呢個女仔簡直係盡得優良遺傳，成身由頭到腳都係為男人而存在嘅，而我竟然因為怪責佢同男仔食飯而激嬲咗佢，唉。
到咗六點，我忍唔住send message畀幽蘭。
我：『想問下，茜旎有無搵過妳呀？』
V：『無呀，但如果佢搵我，可能都會叫我唔好話你知。』咁即係有定無？量子力學咩…
我：『如果佢搵妳嘅話，就好好照顧佢啦。』




V：『使唔使搵人去幫手搵佢，係咪今日無出現過喇？』
我：『嗯，但我完全無頭緒佢喺邊，可以點搵喎。』
V：『咁又係，希望你同佢可以快啲和好如初啦。』