係同屋失友？定係同居勿友？只想同妳做普通朋友…🤦🏻‍♂️: K568

我：「原來…咁我都唔阻妳先喇，入返去啦。」同一時間Myth團已經集齊四個人入咗去隔籬房。
QQ消失咗唔知佢哋心入面點諗呢？最六神無主同唔熟嘅Zilvia應該唔敢諗啲乜，而其他幾條女，似乎就對QQ同我好有信心，所以無過大嘅反應，只係我不停咁喺度咒罵自己琴晚點解要咁衝動，最多笑下佢咪算囉…
行下行下就嚟到禮堂，入面其實唔多人，開咗兩個場，計埋Miss X先得五個人喺度，而幽蘭就喺度同Miss切磋緊；由細到大軟硬大小乜波都打勻晒嘅我當然都打得幾板，亦唔會質疑身為教練嘅Miss嘅實力，不過幽蘭嘅表現就絕對係超出咗我嘅預期，Miss嘅手法睇得出係用盡練波嘅套路嚟回球，而幽蘭就差唔多可以每下作出相應水平嘅發揮。嘩，學Myth話齋，妳玩乜贏乜啦…
我睇咗兩三分鐘幽蘭先發現我嘅存在再向我揮揮手，呢個時候Miss交咗個場畀另一個女仔然後行嚟我呢邊。
明明佢係教我主科嘅先生，但我都覺得佢好恐怖。
X：「死人爽，走過嚟做乜，昅女呀？」
我：「Miss妳嗌我呀…」
X：「唔係嗌你嗌邊個呀，食懵咗？」
我：「唔係嚟昅女，探下朋友啫…」
X：「我唔理你溝女有幾叻，諗住要做好事定壞事，但唔該你同我醒醒定定唔好攪出事。」




我：「吓…Miss嘅意思係…」
X：「我無興趣學其他先生同你條友仔講仁義禮智，如果你有本事食得晒啲女都天下太平我就讚你叻，但你如果燒紅晒啲鑊到最後唔夠鑊蓋呢，我係絕對唔會對你仁慈，你應該明我講乜㗎啦？」佢對眼…會插死人㗎！
我：「係…係！多謝教導！咁我先行告退喇…」
等我之前重羨慕佢老公，睇嚟佢都係一個可悲嘅受害者嚟，試問自己嘅人生落喺一個咁嘅妖女手上呢…
相比之下女魔頭YY呢啲簡直濕濕碎，扑扑脆…
但…詩敏Miss著短裙仔打羽毛球，我都忍唔住要望多兩下…點解家陣啲女人可以keep得咁好嘅呢？
無咗QQ嘅校園生活可以話係度日如年，快啲返屋企算…
點知臨出校門嗰陣我望到啲好恐怖嘅嘢，我即刻雞咁腳跑咗去教員室。
我：「Miss Tang…個男人喺學校出面呀。」
鄧：「我知呀，好彩我頭先喺樓上就發現咗佢。」




我：「點解佢會嚟搵妳嘅？」
鄧：「唔知道，亦唔想知，你唔好走去問佢呀下。」
我：「吓，妳會唔知？乜咁奇怪嘅…」
鄧：「我唔識呢個人，星期一已經block晒佢。」
我：「妳咁好人嘅，唔劏多佢一個手袋先？」
鄧：「你當我係乜人呀，你估係你識啲女神咩…」