係同屋失友？定係同居勿友？只想同妳做普通朋友…🤦🏻‍♂️: K564

Q：「你咁既態度同我講嘢算係乜意思？」
我：「無乜意思，諗緊妳係咪約咗仔食飯唔敢認啫。」
Q：「大佬，佢係我社長嚟，嚴格嚟講就係我老細，個社有物資要買，班會又有，我咪一次過囉，有乜問題？」
我：「買物資原來會預先知道食埋飯嘅，咁幽蘭都係幹事吖，點解唔搵埋佢一齊呀？」
Q：「首先，我唔認為同社長食飯有乜咁大件事，另外你唔係唔知道幽蘭屋企睇得佢好嚴，搵埋佢會好唔方便，而且社長一開始本身就淨係搵我。」
我：「佢梗係淨搵妳㗎，人哋鍾意妳吖嘛。」
Q：「佢鍾唔鍾意我係一回事，總之我就同佢無嘢啦。」
我：「妳覺得如果妳咁同妳條仔講佢會有乜反應吖嗱？」
Q：「我同你好似約定過，我只係借住喺你間屋入面，其他嘢互不干涉㗎可？你去搵其他女仔我有無問過一句你哋發生咗乜事？我有無八過你星期二同幽蘭玩成點，星期三有無同人打出火花呀？」
我：「嗰啲…妳姐妹嚟㗎，咪玩啦，好，我唔干涉妳，妳係有權約邊個男仔食飯都得，我只係驚妳見到隻龍蝦興奮得滯，一路剝殼連自己件衫都除埋啫。」




Q：「交叉仔，你知唔知道自己喺度講緊乜嘢？」
我：「我講乜唔好？唔好唔記得妳一開始就諗住靠賣乜嚟賺錢，就算妳直播都唔係好得幾多㗎咋。」
Q：「夠喇下你！你一直有睇住我點直播知道我無踩紅線㗎喎，家陣你係咪想話我係雞呀？！」
我：「唔敢住，但將來嘅嘢無人敢包，呢個世界咁多姿多彩，鬼叫我請唔起妳食龍蝦咩。」
Q：「你當我係雞咪早講囉！知你養我好偉大喇，過嚟攪我啦，唔使你蝕底呀！」佢一路講一路將校裙連埋底裙除走，剩返入面嘅內衣褲。
我：「係，我一開始就認咗自己係一個鹹濕仔，識妳之前甚至有諗過要幫襯援交妹，只不過因為我太窮…但係我覺得妳係唔同嘅，以為妳一定有意志去堅持住而家嘅生活，所以亦都用盡方法去幫妳，一齊住咗咁耐，乜妳認為我重會咁樣對妳咩？」
Q：「係呀，你最偉大，無咗你我早就做緊高鐘援交妹養自己喇，多謝晒喎。」
我：「如果妳講埋啲咁嘅嘢，我諗我未必會想晚晚喺屋企對住個咁嘅女仔囉。」
Q：「咁咪唔好對囉！我都唔想理你呀！到時唔好喊！」
然後佢就嘭門入咗廁所沖涼，而我都好鬼嬲，就即刻熄燈瞓覺，大熱天時冚(k)冚(h)被對住牆瞓嗰隻。




明明唔啱嗰個係佢先，點解重要話返我轉頭…
不過…好似係自從週記事件之後，我哋第一次鬧大架…
「叮鏘…叮鏘…叮…」唉，鬧完架又點會有人幫我返去…
點知我一起身望過去佢張床，竟然係扁嘅。