為了實現媽媽遺願，我成為了女兒國唐僧: K562

Q：「咁又唔好，食龍蝦重要睇季節，亂咁嚟即係同自己銀包過唔去㗎咋，嗱，開飯先啦。」
啲女神…恰如其分無一個唔係神神化化嘅，對得多我都驚自己會思覺失調，如果唔係同妳住埋一齊晚晚對住，我諗我早就認命是但搵返個普通女仔做女朋友算…
星期三，有大家都以為佢M到但實質衰過M到嘅班主任，有望落似乎已經適應咗新關係嘅傻仔健，重有對住啤牌就好似變咗另一個人嘅幽蘭…然後嚟到星期四。
U：「嗱，我琴日已經買咗部份底紙嘞，既然你想幫手就不如陣間放學幫手釘上去啦。」
慕：「可以嘅，都係啲簡單工夫嚟…」
U：「重有前面嗰個，唔好專登唔郁隻耳仔，實預埋你㗎喇。」既然係咁妳不如唔好講出嚟啦。
然而到咗放學嘅時候…
U：「麻煩晒你兩個喇，釘完之後科長自己還匙就啱啱好。」佢講完就從容不迫兼拍拍蘿柚走咗去。
剩返我同男班長兩個你眼望我眼，雖然我對佢嘅印象講唔上話有乜好感，但都未至於係敵人嘅，尤其係當我基本上肯定到QQ對佢無興趣，所以共處一室亦唔會打架；而釘底紙呢家嘢，一個人做可能會有啲勉強，三個人做就顯得有啲多餘，所以天王星計過度過搵咗我哋兩個牛高馬大…
我：「咁快快脆脆開工，釘完就可以走人…」




天王星揀嘅係淺灰色嘅雲石紋厚身底紙，一望就知唔會平，至於班會錢夠唔夠cover已經唔係我應該去擔心嘅問題，因為呢幾條女應該都唔會care呢樣嘢。咁釘底紙都有技巧嘅，例如完整攤開拉平先好落釘，疊好邊位先好落釘，講多無謂，總之我做㩒住班長負責落釘。
最衰都係你，借啲意又話嚟幫手，如果唔係你阻頭阻勢我就應該可以同是但一條女釘，或者自己釘…
慕：「想問下，你做乜咁鍾意同呢班女仔玩嘅？」
我：「無話鍾唔鍾意，只係咁啱坐埋一齊。」當然我同QQ嘅秘密關係加上Miss嘅黑箱作業係佔好大比重。
慕：「唔係話我睇唔起你，但睇怕呢幾個女仔就唔會真心對你有興趣嘅，乜咁樣好咩？」
我：「你睇唔睇得起我唔重要，我都知自己廢，但就咁望落佢哋幾個都唔會對你有興趣，所以我哋好平等啫。」我知你心入面好唔鍾意我，唔代表我廢就唔會反擊，而事實上我相信自己枱底下面同班女嘅關係好到你下世都恨唔到，只不過我唔可以講出嚟大你咁解。
慕：「見你以前喺出面都溝到女，唔明做乜而家要圍住佢哋轉來轉去樂此不疲。」