係同屋失友？定係同居勿友？只想同妳做普通朋友…🤦🏻‍♂️: K561

Q：「啊，你又去跟天王星一齊買三餸飯呀？」
我：「係呀，等我蒸返熱啲飯就有得食喇。」
Q：「其實你同佢都幾夾㗎喎…」
我：「做乜無端端咁講，定係唔啱食？下次唔買囉…」
Q：「唔係呀，今時今日我重邊有得揀喎…只係想講天王星啲生活習性比較貼地，好似幾啱你。」
我：「佢啲性情咁火爆，好難會有仔覺得佢啱㗎喎。」
Q：「係咩，我重以為你同佢打架打得好開心。」
我：「點會喎，打架係危險活動嚟，邊個受傷都唔好…」
Q：「我重諗住你有機會可以拗返直佢添。」
我：「佢要直就自然會直㗎啦，邊輪到我哋嚟操心。」




Q：「如果…要你係幾個女仔之中揀一個你會點揀？嗱，唔准揀我㗎喎。」
我：「可唔可以問下點解唔准揀妳先？」
Q：「以你咁懶嘅性格，對咗我咁耐實覺得適應晒，唔想煩之下就自然會揀我㗎啦，但呢個有違擇偶嘅基本原則囉。」到底係乜原則？乜唔係兩個人相處到最重要咩？
我：「唔會揀Zilvia，我可以保護佢，但係我哋嘅基礎性格太過南轅北轍，唔認為可以開心相處到。」
Q：「嗯。」妳個樣咁期待係想點？
我：「幽蘭都唔好，妳知我承受唔到壓力…」
Q：「呢個我都明嘅。」
我：「剩返兩個…Yvonne雖然有時係嘴賤啲，但無可否認佢係比較高EQ同成熟，唔會好似天王星咁喊打喊殺，而且佢有戀愛經驗應該比較易溝通，雖然我都唔太鍾意呢個答案…」當然YY喺我眼中係有可愛又可恨嘅另一面…
Q：「我都有諗過呢個問題，Yvonne睇落雖然唔係特別標（䅺僄）青，但揀佢似乎係最安全。」
我：「或者無重大缺失就係佢最大嘅優點掛。」




Q：「咁睇嚟我都要調整下，我唔想做剩女。」
我：「妳咪玩啦，妳要仔唔係同點兵差唔多咋咩，至少學校有唔止一個等緊妳。」
Q：「咁唔剩係男朋友嘛，要搵個肯成世照顧我至得，我都唔想俾人嫌我嘴刁唔貼地。」
我：「論唔貼地我諗妳哋幾個拍馬都追唔到幽蘭。」
Q：「但我諗對佢自身嚟講做乜都係無分別…嗯，係紅衫魚。」佢望住條魚若有所思咁。
我：「平時無乜機會煮魚，所以就要咗佢。」妳唔好話唔食呀，咬妳㗎，好歹要加成四蚊，罐頭吞拿妳都食…
Q：「紅衫魚係紅色，東星斑都係紅色…嗯，重有蝦乾粉絲雜菜。」
我：「三餸飯來來去去都係呢啲㗎啦…」
Q：「如果有間三餸飯提供芝士焗龍蝦伊麪，唔知有無得做呢？」係咪自己貼唔到地就迫其他嘢貼地嘅道理？
我：「咁我公司都有嘅，妳好想食可以去食返餐…」