係同屋失友？定係同居勿友？只想同妳做普通朋友…🤦🏻‍♂️: K556

慕：「我最想問嘅係，到底阿爽佢有乜好？」
我：「吓，我唔明你嘅意思，我從來都無話過佢好。」
慕：「咁點解佢成日出現喺妳身邊，重可以喺妳嘅姐妹圈入面轉嚟轉去，佢識咗Vienna幾日就帶埋人去橋牌學會，本來激到女班長想殺咗佢咁滯，但而家就有講有笑…」
的確…我從來就無叫過佢哋要同阿爽玩，一開始亦唔認為佢哋會玩得埋，但事實證明佢對住任何一個女仔都可以撈得埋咁滯，呢條PK仔真係…
初初我都剩係覺得佢係條廢J粉腸，但而家…
我：「嗯…我諗…佢最好嘅地方就係佢無乜嘢好，唔會有乜嘢畀到我哋，佢亦唔會妄想喺我哋身上面攞到啲乜，佢應該係第一個男仔，令我覺得可以無顧慮咁同異性做朋友，至於佢同我啲姐妹…我無理過，所以no comment。」
慕：「妳真係只當佢係朋友？」
我：「如果唔係？我本身就有男朋友。」
慕：「你無理由唔知佢以前係點㗎？周街撩女仔重喺學校門口攬女，份人無嚟正經之餘聽講重好好色。」
我：「我知道，但咁又點，佢點對其他人我唔會理，唔通佢點對我我會唔知咩？定係你覺得我會作賤自己？佢可能真係無乜優點，但你唔係認為自己睇落好企理，講嘢比較有禮貌就唔鹹濕呀？唔好忘記我係有男朋友㗎…」




慕：「我只係唔明點解妳哋會接受佢做朋友啫。」
我：「佢好彩啫，不過唔好認為我哋唔接受你做朋友，而係…你都唔敢講你走過嚟係無任何動機呀？」
慕：「阿爽接近妳哋又真係無任何動機？」
我：「最大嘅動機可能係為咗借我哋啲功課嚟抄…」
慕：「我以為…想認識下優質女仔都只係人之常情啫。」
我：「啱嘅…但遺憾地我哋呢邊無需求，我，Yvonne，思韻係有男朋友，班長同Zilvia短期內應該唔會識男仔，至於幽蘭我勸你唔好打佢主意，如果你睇唔開嘅話最多可以試下撩Yvonne玩，係驚你會變成受傷嗰個。」
慕：「傻啦，喺我眼中只有妳係最特別。」
我：「多謝，你只係執著於以前嘅認知啫，不過我就覺得，如果你想溝女嘅話，以你背景應該無乜難度，尤其係我觀察到班上面似乎有女仔冧你，但你黐埋嚟就肯定無著數，好多其他女仔其實唔太鍾意女班長甚至係Yvonne，咁會對你做成負面影響。」
慕：「如果唔係自己鍾意嗰個又有乜意思喎。」
我：「有無意思你自己決定，我影響唔到你，但如果因為我而累到你浪費咗自己嘅青春將來後悔，我都會過意唔去，有機會不如同多啲女仔玩下，不過就請你唔好對佢哋太衰嘞，我都要維護下其他女仔嘅權益。」




慕：「喺我眼中妳實在係太叻，做乜都咁出色。」