係同屋失友？定係同居勿友？只想同妳做普通朋友…🤦🏻‍♂️: K555

V：「傻啦，而家淘寶都有得客製，係百零個人哋唔會做啫，跟住就係要喺個盒上面寫字。」
U：「呢個我負責啦，我搵電腦鎅字公司整，咁我哋貼上去就得，慳返好多步驟。」
J：「妳哋幾個…真係商業化到一個點。」
我：「其實…我哋肯落手整算係好畀面，而唔係成塊買…」
U：「咁我返去睇下網上面有邊個版本嘅元素表最靚，然後就用嗰個嚟做藍本落手整啦，今日到此為止！」
我哋一齊孭書包執嘢走人，Uranus負責返鎖門。
U：「欸…散場喇喎，你重跟埋過嚟嘅？」
慕：「放學啫，一齊行都無乜問題吖…」
U：「咁我哋大方啲讓你行先，我哋女仔行得慢呀，唔好意思要你就我哋步速。」…，呢個短跑金牌真係…
慕：「其實…我想搵人謦下嘢。」佢嘅視線離開咗Uranus，落咗喺我嘅身上。




U：「啊，想借走我哋個好姐妹呀？」
慕：「又唔好咁講，如果妳哋有嘢搞…唔方便就算啦。」
U：「咁妳覺得點，Queenie？」
我：「妳哋行先啦，我handle到，我都慣咗俾仔煩。」
Y：「咁聽日見喇，如果有人蝦妳記住大聲嗌唔好。」
望住佢哋落樓梯，我哋就留喺後樓梯度講嘢，橫掂呢度比較少人，而且可以望住下面啲人打波無咁尷尬。
慕：「呢度好歹都係學校嚟，做乜講到我要做衰嘢咁…」
我：「Yvonne把口不朽都係咁，你由得佢啦，有乜嘢就快啲講，我要返屋企做功課。」
慕：「Queenie，對唔住呀，係我以前，無好好認真對你。」望住呢啲男仔個樣，唔知點解我覺得麻目。
我：「無嘢喎，我都唔覺得你有乜點對我。」




慕：「我嘅意思係…其實妳應該明嘅。」
我：「嗯，我明嘅，你走嚟搵我想點我都明，其實我當時對你都無乜expect，所以無所謂啦，你亦都唔使覺得後悔，就算你嗰陣好認真都唔見得會成功，反正都已經過咗去，我唔會擺喺個心度，會當返你係普通同學咁相處。」
慕：「妳…係咪識讀心術㗎？」
我：「對得男仔多係咁，我都唔想。」
慕：「Queenie，我真係好欣賞妳㗎…其實我嚟搵妳又唔係為咗啲乜嘢目的，自問都唔係好差啫，唔使一開口就要請我食閉門羹咁呀。」
我：「講清楚以免誤會啫，我無心要玩你，同埋你唔好唔記得我係有男朋友嘅，就算做樣我態度都要配合返。」
慕：「假如…有一日妳同男友散咗，唔知我會唔會有機…」
我：「一個女仔冧你嘅話，就算有無仔都會投懷送抱啦，唔建議你問啲咁蠢嘅問題。」
慕：「點解妳要係一個咁叻嘅女仔，叫我點忘記妳…」
我：「我唔認為有幾叻，我只覺得自己係一個麻煩嘅港女…」重係交叉仔口中所講唔食青豆最難頂嗰隻。