係同屋失友？定係同居勿友？只想同妳做普通朋友…🤦🏻‍♂️: K557

我：「我唔覺得你咁樣係讚緊我，有好多傻妹等緊你㗎，好好去享受人生啦。」
慕：「真係有先算啦，同埋我想問下點解妳會幫Vincent手做嘢嘅？」
我：「咁係因為同一個社咋嘛，又唔到我哋揀嘅。」
慕：「我知…但佢應該係明顯地…想追妳㗎喎。」
我：「唔使明顯地…我有乜可能唔知噃，我哋唔係玩緊默劇。」
慕：「咁嘅話妳重走去做幹事，唔怕尷尬嘅咩？」
我：「一個人怕尷尬重談乜鬼戀愛喎，佢有權鍾意我，唔代表我要接受佢，就算我拒絕咗佢，唔代表唔可以一齊做嘢，其實無乜衝突，不過你就唔使關心佢或者羨慕佢，我諗佢都唔會有幾好受。」
慕：「明白…如果妳回復單身嘅話，可唔可以話我知？」
我：「呢啲嘢，你要知就自然會知㗎啦，到時可能你有女朋友㗎喇，如果你無嘢再問就行先啦。」
慕：「我…自己落去先？」




我：「係呀，你係咪想成間學校話我周圍玩仔先安樂…話雖我都唔係好介意，但我無呢個能耐呢。」
佢就係咁樣俾我推走咗…其實佢除咗扮嘢啲之外都無乜嘢嘅，之不過而家我對呢啲男仔已經無晒心動嘅感覺。
※※※※※
我：「鄧老師，呢度係妳要嘅作文改正同埋回條。」
鄧：「嗯，麻煩晒，放學啦。」
我：「Miss Tang，其實我有啲嘢想畀妳睇下。」
鄧：「喂，你唔好亂嚟好喎，自己嘅事唔該自己處理返，好多嘢我都幫唔到你㗎，拜託唔好影響我返工嘅心情。」
我：「唔係呀，係關於妳嘅事㗎…」
鄧：「吓，我嘅事關你乜事，唔係有人要投訴我呀？」
於是我攞部電話出嚟將之前錄影嘅嘢播畀佢睇。




我：「我都唔知有無認錯人㗎…」佢望咗一眼已經呆咗。
鄧：「點解…係乜嘢事…而你…」變埋死魚眼添…
我：「唔好鬧我呀…只係上個禮拜我有一日喺出面撞到妳同呢個男人行街，然後琴日又撞返佢…」段影片其實係得十秒左右，啱啱播完。
鄧：「嗯，唔該你，我知道，放學啦。」
我：「Miss妳無嘢吖嘛…唔好太過唔開心…」
鄧：「大人嘅事你唔使理，返屋企啦。」
我：「哦，咁好啦，take care…」
明顯地佢好似跌咗落地獄咁，而當我擰轉身嘅時候…
鄧：「爽，件事…拜託唔好同任何人講，反正…其實無事，無任何嘢發生過。」佢開始淚眼汪汪咁。
我：「係！知道！我返屋企喇！」我都驚咗佢咁嘅款。