thriXt Qantasy 純文字安眠之作 (New: - U2K - 一直上架): K554

我：「咁呀，個信箱要厚啲喎，我習慣成疊收。」
J：「咁…其實大家即係同意信箱呢個概念啦。」
V：「無所謂，跟大隊，睇住妳哋個箱滿瀉會好開心。」
Y：「可能第一個爆嘅就係妳呢，話晒妳係插班生喎。」
唉，唔好以為我哋女仔做嘢好有效率，啲八婆欬多到呢…
U：「但有一個問題，人哋呢個示範都只係霸咗塊壁報嘅一角，而且設計簡單，咁樣唔夠撐㗎喎。」
J：「無嘅，美觀嘅嘢都係材料同成本問題，無論點整我哋都係整三十四格信箱，唔會霸得晒塊板㗎喎，一係…整到變成好似一個大型座位表咁，隔籬有嗰位同學嘅profile，不過咁樣可能又要貼相…」
U：「咁好大鑊喎，如果調位使唔使跟住搬？」
J：「咁可以跟學號嘅，就一勞永逸。」
我：「我就覺得，叫人貼相實有好多人唔鍾意，叫人喺上面介紹自己亦會有好多人唔想做，好似阿爽呢啲實會懶到喺上面打個交叉就算，又無理由我哋幫佢哋寫埋㗎。」




Y：「妳真係幾時都咁關心自己隻兵嘅啫。」
我：「兵乜鬼吖，佢而家under佢嘅custody。」
慕：「如果…可唔可以整個月曆出嚟合拼埋一齊。」
我：「月曆嘅話無三十四日喎，突咗出嚟好怪。」
U：「其實每個月有幾多日有活動吖，到時大部份吉咗又係唔好睇，成個未填嘢嘅乘數表咁。」
V：「而且你跟唔跟返星期一至日先，要每個月執一次…」
J：「一至三十四個號碼，令我諗起六合彩，如果用呢個主題嚟佈置應該會幾靚。」
Z：「點得喎，有賭博概念嘅嘢學校實ban…」
U：「號碼…排列…如果整個periodic table出嚟得唔得？諗落重好實用添！」
Y：「妳都幾大想頭㗎喎，夾埋有成過百格…」




U：「咁尾嗰啲可以吉咗佢嘅啫，我哋最大問題其實係要諗辦法fill up晒啲無聊空間，以元素表嘅間格本身就好配合壁報板嘅大細，所有同學重可以攞嚟溫書添，而且我相信肯嘥心機嘅話一定可以整得好靚。」
V：「啱嘅，重好襯返我哋班嘅風格，亦未見人咁整過…」
J：「我相信學校實無意見，亦唔會有空泛無聊呢個問題，不過呢樣嘢本身係比較繁複，要嘥多少少時間同手工。」
Y：「我喺度諗，嗰百幾格做信箱嘅格仔其實可以唔使自己整，有時啲朱古力或者mask嘅卡紙盒係啱啱好呢個大細，不過要搵純色嘅可能比較難，或者要買貼紙貼。」
V：「想搵商用紙盒？我可以安排呀，要幾靚都得。」
U：「但我哋要成過百個喎，會唔會比較麻煩？」
V：「其實就…唔會嘅，一千個以內應該都可以做到，同埋唔係我煩，我搵公司啲人做啫，如果啱款嘅話佢哋直接用返嗰個版叫生產商加印都得。」
Y：「識到妳真係太幸福！好想惜妳一啖呀！」