係同屋失友？定係同居勿友？只想同妳做普通朋友…🤦🏻‍♂️: K553

U：「係嘅…妳睇下，佢哋呢班都係留到中六先嚟玩嘢，或者我哋諗下有無其他實用啲嘅設計攞嚟參考啦。」
V：「呢班畫咗個IG嘅版面，我諗佢哋嘅概念係想整個班page嘅實體化，可惜都只係貼咗兩張班相同其他通告，同個設計有少少格格不入。」
Y：「可以話係得個框做樣，唯一作用係同人講呢塊係壁報版嚟，當然如果貼妳哋啲靚相出嚟就另計。」
我：「係都妳先啦，唔知係邊個最快解禁比堅尼相呢？」
Y：「呢啲一日解禁嘅嘢，過咗去就唔好提啦…」
慕：「乜…原來有啲咁嘅嘢，我都唔知…」
我：「呵，妳咁鍾意儲火都唔俾人follow妳咁衰嘅。」
Y：「唔關事囉，佢都無request過我，應該就係人哋要追個目標唔係我嚟嘞。」
U：「就算無追，你唔喺啲女神分享group咩，應該有人share㗎，點會得一日限定吖。」
慕：「無呀，我正人君子…點會參加呢啲group。」




U：「真係？定係其他仔唔歡迎你加入咋。」
慕：「唔知…我都未聽過有呢啲嘢。」
J：「欸，呢個設計好似幾實用喎，整咗個舊式大廈信箱出嚟等啲同學可以互相寄信，重好過留言版啦。」
Y：「哈，咁會唔會有偷信問題出現，不如DM算啦。」
U：「咁又會回歸返問題核心，其實而家班group同eclass已經可以做到所有嘢，塊壁報板確實只係攞嚟睇。」
Z：「就算用都係攞嚟玩，點會寫緊要嘢，唔驚俾人偷嘅…」
V：「未必喎，可能會有好多人攞嚟寫情信呢，雖然未必有下款。」
Y：「傻豬嚟嘅，要玩呢啲嘅一早識自己放櫃桶同攝locker，使鬼靠你塊壁報initiate咩…」
V：「咁又係，我以前學校比較少呢啲，係呢，咁妳哋有無收過類似嘅嘢？」
我：「今年都無收過，可喜可賀。」




Y：「妳姐妹佢出pool之前，差唔多個個月都有㗎！」
我：「好意思話我，妳都收過唔少，重攞嚟玩添。」
Z：「其實…我上個禮拜啱啱收到一封…」
U：「真係？！有無署名㗎，或者認唔認到字跡？」
Z：「呢層…我打開睇完頭兩行見到唔對路，就返圖書館碎咗嚕，所以連有無下款我都唔知。」
Y：「乜咁大嘥呀，妳改咗個上款畀Vienna等佢開心下吖嘛。」
Z：「咁…我真係用唔著吖嘛。」
我：「邊使客氣，我肯定佢遲啲都會收到。」
慕：「我會覺得唔錯嘅，實體信箱除咗可以寄信之外，重可以放其他實物，應該會幾好玩。」
我：「啊，你又諗住摺朵花攝入去呀？整皺就無謂啦。」




慕：「唔好笑我啦，我無諗住咁用…」
Y：「你寄啲連卡佛禮券畀佢就啱，呢個女人比較實際。」