係同屋失友？定係同居勿友？只想同妳做普通朋友…🤦🏻‍♂️: K552

我就唔認為男班長係想嚟溝女嘅，雖然佢就一定有呢個妄想，應該話每個男仔都絕對會有，正如我知道死人交叉仔晚晚都想食咗我一樣…其實畀佢食可以係一件好簡單嘅事情嚟，問題係食完應該點？我自己都唔識答。
U：「咁不如你搵下先，我真心唔想諗。」
Y：「哈哈，商業角度嚟講無嘢好得過抄，最實際。」
慕：「呀，我搵到間學校真係將某一年嘅廿四班作品放晒上網，不如我放條link上班group？」
U：「唔好，你send畀我就得，我哋有私group。」
由於思韻佢唔喺group，我當然即刻forward埋畀佢…
慕：「原來學似個肥仔講，真係有人用花花草地做背景…」
Y：「你估佢講笑咩，小學生標配嚟，夠膽嘅話可以一直用到大學，就算呢間學校都出現過。」
V：「廿四班…原來有三班都用樹嚟做主題。」
我：「桃李滿門吖嘛，又係好悶，抄唔抄都係咁。」




Z：「我唔係好想貼自己幅相喺壁報板上面…」
Y：「唔使驚，有男班長喺度看住，無人偷妳幅靚相嘅。」
Z：「我唔係呢個意思…」
我：「唔呀，ban呀，我哋日日都喺度㗎啦，一係一齊返學，一係一齊放假，做乜有真人唔睇要貼幅相喺度獻醜，除咗益借班房啲同學等佢哋指指點點之外無任何用處。」
U：「咁話時話整壁報又真係無乜用，妳睇下呢啲slogan派，乜乜物班，相親相愛，和諧共融，睇到都想笑。」
Y：「嗯，再歡樂啲，改做男女班長，和諧共融。」
U：「喂，好好笑咩，我唔覺得我同佢溝通有乜問題喎。」
V：「妳哋唔好玩啦，攪到佢個樣唔知點好喇…」
Y：「唓，佢出現得喺度，就有呢啲機會㗎啦，本小姐就係咁嘅德性，可能佢好想俾人調戲呢。」
慕：「妳哋鍾意啦，我諗我唔出聲比較好。」




U：「認真啦，如果諗到句好嘅標語，係咪可以搵你哋寫出嚟？話晒Myth同幽蘭你兩個寫開書法。」
慕：「齋寫係可以，唔好叫我諗就得，你叫我寫乜就寫乜。」
V：「欸…理論上係可以，但我唔想塊壁報板變成我嘅書法貼堂。」
J：「咦，呢句好攪笑呀，有人引用魯迅句名言嚟做壁報；生命是以時間為單位的，浪費別人的時間，等於謀財害命；浪費自己的時間，則等於慢性自殺。睇嚟呢班啲同學都好痛恨壁報設計比賽，或者你哋可以參考下。」
我：「我無所謂呀，但以我哋班主任咁怕事嘅性格，佢睇到實嚇到腳震都似，唔驚喺教員室俾人話咩…」