為了實現媽媽遺願，我成為了女兒國唐僧: K551

慕：「講真無乜…都唔好意思喺妳哋幾個前面獻醜。」
U：「咁不如你都放學先啦，我哋幾個會死掂佢㗎喇。」
慕：「又唔急嘅，話晒我假假地都係班長嚟…」
U：「如果你幫唔到手又留喺度做乜吖，想溝女呀？」
慕：「阿女班長…乜妳咁直接㗎，想我點答喎？」
U：「第一日識我咩，我幾時都係咁直接㗎啦，幾時有同你轉彎抹角過？」
慕：「欸…佢夠喺度日日轉嚟轉去，又唔見妳咁話佢…」
我：「喂，你估我好想喺度呀？我係等佢哋開完會負責鎖門咋，你睇我個款就知我永遠唔會想幫手整壁報板㗎啦，至於溝女，大佬，佢哋幾個係女神，係仙女，係女王，我溝條毛咩，我做人唔會咁唔自量㗎喎，所以只會當佢哋係朋友。」
Y：「靚仔，你都幾誠實，我欣賞你，抵Queenie同Vienna兩個咁鍾意同你玩。」佢走過嚟搭我膊頭，我諗呢個舉動已足夠令到男班長唔鍾意我，而QQ就望住唔知點咁。
V：「乜喎，無端端又拉埋我哋嚟講…」




U：「得喇，畀條鎖匙我啦…不過你唔使指擬走得甩，牛高馬大實搵你負責釘底紙，唔好唔記得你應承過我啲乜。」
我：「吓…是但啦，咁我走先喇，重要交功課同回條畀Miss Tang…」
我放低鎖匙行出課室，點知QQ又追咗出嚟走廊。
Q：「喂，你係咪真係諗住走去同佢講嗰單嘢？」
我：「嗯，話晒佢平時都叫有照住我，所以梗係會幫返佢啦，我都唔想自己Miss俾壞男人呃。」
Q：「其實…最好你就認錯人啦，如果係真嘅話，你千祈唔好亂咁講啲多餘嘅嘢知唔知？」
我：「妳放心啦，我成日對住妳哋班女人，點會唔知有乜係唔講得喎。」真係當我傻仔健咩…
有人問健仔做乜唔留喺度陪我？因為有人空堂囉，半個鐘都唔放過，唔方唔快炮加鞭咯。
Q：「唔同㗎，話晒佢係大人嚟，你千祈唔好加鹽加醋…」
我：「我明白嘅，妳入返去同佢哋謦壁報啦，如果唔係男班長又話我哋幽會㗎喇。」




Q：「我理得佢點諗吖，就算覺得我人盡可夫都唔關我事呀，我對佢完全無興趣。」然後就返入課室。
其實男班長都唔係好差啫，真心唔明妳哋啲擇偶準則…
※※※※※
慕：「我意思…唔係參考自己學校，可以係其他嘅啫。」
U：「即係點？參觀其他學校，定係問自己識嘅人？」
慕：「間間學校都有比賽嘅啫，或者會有啲將結果放上網嘅…」本身…我對啲煩人嘅男仔就無乜嘢嘅啫，只不過我哋呢個組合係會令到件事更加煩。