係同屋失友？定係同居勿友？只想同妳做普通朋友…🤦🏻‍♂️: K550

我：「傻啦，呢啲邊係幸福嚟，隨時係煩惱…」
W：「唔知你，總之以後唔好扮唔識人就得，係咁先。」佢拍一拍我膊頭，然後起身執嘢走人。
我：「點會喎，我哋小同嚟㗎嘛。」
佢再望咗我一眼，然後就擰轉身走人。雖然我同佢難言有啲乜朋友以上嘅感情關係，但我始終都睇過又接觸過佢嘅身體，係有少少感觸嘅；我已經分唔清自己究竟係念情定仆街，間唔中我都重會無意中勾起幫佢剃毛嘅畫面。
到咗放學，一大堆人走晒，重有一大堆人喺度。你問我做乜喺度？因為我要負責閂門鎖課室…
J：「我諗美術嘅嘢，我都幫到少少手嘅，一齊諗啦。」
U：「咁就最好，其實我每年…最唔鍾意就係做呢啲無聊嘢，最慘今年呢班又真係無乜人衝出嚟負責。」
V：「妳哋都幾得意，成班女仔又會無人鍾意整壁報板都有嘅。」幽蘭講嘢真係一針見血。
U：「我就算啦，呢兩隻嘢超現實，點會想交呢啲功課…」
Y：「吖，咁話我哋都有嘅，雖然唔識反駁。」




Q：「係囉，不如將今季新出嘅手袋印晒高清大圖出嚟貼上去就算，應該會幾美觀。」妳講真定講笑呀…
Z：「係呢，幽蘭妳喺以前學校有無整呢啲㗎？」
V：「無乜，因為全班女仔，總會有一兩個天才好似大家姐咁話晒事，而我之前同佢哋唔熟，最多貼下嘢咁…」
我以前成日覺得女仔都係美術天才，睇嚟存在咗一啲誤解，又係嘅，單單一個QQ家政都差我十條街，嘢食唔識整，衫唔肯洗，莫講話幫我聯褲呢啲…
豬：「欸，我身為班會主席唔好意思走先先留喺度睇下有無嘢可以幫手㗎咋，如果妳哋無乜idea，我諗我都幫唔到啲乜，可能會阻住妳哋添…」
U：「唉，你走先啦，我哋謦完有用得著你嘅時候再搵你啦，啲剪剪貼貼實預埋你一份嘅。」
豬：「多謝女王，咁我走先喇！Bye！」
U：「叫咗你好多次唔准咁嗌我呀！係咪想死？」好彩佢個位無粉刷喺度，如果唔係我相信一定會成枝追蹤導彈咁飛去個肥仔背脊度。
其實佢都幾似女王嘅，雖然隔籬兩個唔出聲嘅更專業。
慕：「如果無idea嘅話，或者可以參考下其他班點整？」




U：「其他班？班班都喺度煩緊啦，點會咁快整好。」
Y：「咪係囉，就算人哋整得靚，唔通我哋可以抄咩，俾人知道盞笑死我哋班㗎咋，重衰過整得肉酸。」
J：「或者男班長你本身有無乜idea先，有嘅就不妨講出嚟啦，呢啲嘢唔一定係女仔話事。」