為了實現媽媽遺願，我成為了女兒國唐僧: K531

Q：「講兩句就現形啦，你條友無得救㗎喇，日日對住成堆女神以後唔使識女仔，啲乜嘢韻婷邊睇得上眼吖，勸你服侍得天王星好啲，或者重有機會嘅。」
我：「做乜無端端提佢，我唔啱啲咁暴力嘅女仔。」
Q：「吃不到的女孩是暴力的係咪？唔好同我講你覺得佢唔正呀，一句講晒，有得食嘅話食唔食？」
我：「妳咁樣問我唔公平喎，男仔…見到靚女就有反應㗎啦，但妳諗下，要日日對住佢，乜唔係災難嚟咩？」
Q：「你對住我都災難添呀，所以咪話性慾係會衝昏頭腦，當你突然之間得到佢梗係覺得愛佢㗎，甚至認為佢都愛你，但呢啲嘢係完全無保證㗎。」
健：「係，佢唔鍾意我，但我肯定…而家淨係鍾意佢。」
Q：「佢係咪肯繼續同你玩？幾個月後可能就淡。」
健：「應該唔會，我覺得自己越嚟越鍾意佢。」
Q：「唉，而家同你講乜都無用，你嘅世界得佢一個，無同其他女仔相處過，實覺得佢係全宇宙最好，因為無比較吖嘛，不過又無所謂嘅，你覺得咁落去無問題咪繼續，我支持開放式關係㗎，但你唔好以後喊住又話自己受傷。」
健：「應該唔會喇，我睇化咗，我覺得鍾意佢就要接受佢，如果我嫌佢呢樣嗰樣，咁同唔鍾意佢有乜分別…」




Q：「雖然我身為女仔，但都唔會話剩係幫女仔講好說話嘅，我覺得每個人都應該有佢選擇點生活嘅自由，如果佢無立壞心腸呃你感情嘅話我都唔會話佢係壞女仔嘅，但你真係要考慮清楚先好，你而家無得揀唔等於將來無得揀，最驚到佢接受你嗰一日時你已經厭倦咗佢，我唔想睇到你哋互相傷害。」
健：「其他女仔…應該唔會畀到呢個感覺我。」
我：「攪笑，有邊個女仔會畀感覺你？你唔係講師姐…」
健：「梗係唔係啦！嗰啲分明係你無聊得滯攪事。」
我：「吖，咁都可以怪返我轉頭嘅…喂，你唔係想講Kuromi無畀感覺你呀，呢個女魔頭點會咁做。」
Q：「我唔會咁做係因為我無諗住呃人，呵。」
健：「唔係呀…係因為其他女仔，真係無感覺。」
Q：「我想問何來其他女仔，你比較嘅基點喺邊？」
健：「比較…係因為…阿欣佢…搵其他女人攪我。」
本來重係笑緊佢俾女玩，聽到呢句我同QQ噴飯咁滯。




Sor…如果要噴，QQ噴嗰啲應該係米粉嚟。