係同屋失友？定係同居勿友？只想同妳做普通朋友…🤦🏻‍♂️: K530

Q：「你覺得可信性有幾高吖，一個十幾歲男仔講啲咁嘅嘢出嚟，你而家個世界得佢就梗係咁講㗎。」
健：「乜真係咁唔可信咩，我覺得而家真心鍾意咗佢…」
Q：「唉，就算我條仔話想成世淨係對住我一個都唔信啦…有邊個男仔唔想玩，日日對住呢條友就更加咁覺得。」
我：「欸，好歹…我而家係單身乖仔一個嚟。」
健：「但咁樣唔係好灰咩，無信心妳又同佢一齊？」
Q：「我反而係對男仔太有信心囉，人係貪心㗎，都鍾意玩，咁個個都係咁㗎啦，至少佢而家對我好咪接受佢。」
我：「即係而家欣姐唔認你係男朋友，剩係同你玩？」
健：「你可以咁講嘅，佢話我一日唔係大學生都唔使指擬追佢，而且係五大先考慮。」
我：「重有好幾年，等得嚟佢分分鐘嫁咗人。」
Q：「即係點，佢由得你喺身邊但又唔接受你？其實同玩你無分別㗎喎，佢當多條仔惜佢啫。」




健：「可以咁講嘅，佢話…只要我唔煩到佢或者令佢唔開心，唔介意我留喺佢身邊，但唔好諗住攞到啲乜。」
Q：「佢都好自私㗎喎，即係你可以對佢好，但佢就唔會向你承諾任何嘢，隨時可以劈咗你。」
健：「香港女仔係咪個個都係咁…妳都差唔多啫。」
Q：「你！好嘢呀下…識到女就燒埋嚟我度添。」
我：「一句到尾，佢只係肯同你玩，而你又受咁啦。」
健：「我而家又無得揀…同埋我越嚟越鍾意佢。」
Q：「聽住先啦，玩玩下就厭，大部份情況都係咁。」
我：「即係無結論啦，佢有佢繼續，由得你繼續對佢痴迷…咁食完飯點，除咗開房扑嘢重有乜可以做？」
健：「係有開房…不過今次我畀晒房錢，咁唔止做嘅，我有同佢談心，想瞭解佢多啲。」
Q：「唉，都唔明我一個美少女點解要同你哋討論呢啲問題，其實你有無諗清楚…你到底係鍾意同需要佢個身體吖，定係鍾意佢個人？雖然分清楚你可能都係咁。」




健：「我已經分清楚，我係鍾意佢個人。」
Q：「你憑乜咁肯定…而唔係鍾意用佢個人？」
健：「因為…鍾意同一個女仔做，唔等於鍾意佢本身，而我鍾意佢…唔剩止係因為同佢嘅關係。」
Q：「我想問你哋識咗幾耐啫，而且你…無論點諗你都重係沉醉緊喺性慾所帶嚟嘅快感入面，不如你問下呢條友，佢到底有無愛過細蚊吖。」
我：「喂，做乜又燒埋我，我而家不知對佢幾好。」
Q：「因為我know you so much，你對佢好係因為覺得以前負咗人哋想補償返咋，如果你有深愛過佢，點解唔考慮下要返人哋，又或者掉轉問，如果你無識過細蚊，而家佢走嚟話想同你一齊，你會唔會接受吖？」
我：「…」