為了實現媽媽遺願，我成為了女兒國唐僧: K529

錯覺嚟啫，酒樓朝早其實多客所以應該換過嘅。
首先就剔嘢食，我係四寶飯，QQ係廈米，健仔係喱牛。
我：「姨姨唔該，唔使開茶喇，我自己去攞汽水。」為咗吸引啲唔鍾意飲茶嘅學生，我哋免茶免加一，唔開茶嘅話就自取汽水一罐，來貨兩蚊罐左右，好過服侍你哋。
我：「嗱，呢度三罐zero，你哋唔飲茶㗎啦。」
健：「我要芬達，幫我換咗佢。」
我：「你係咪玩嘢呀，好人好者飲乜鬼芬達？」
健：「唔制，你喺呢度做，有責任幫我換返啱。」
我：「頂你吖，你知唔知zero係Kuromi嘅標配嚟？」
健：「唔知道…我知道阿欣佢飲芬達。」好，我忍。
換完返嚟條友攤咗喺枱布上面嘆氣，都唔知攪乜。




Q：「嗱，你話有嘢講我先嚟咋，唔好剩係攤副天妒英才咁嘅樣畀我睇好喎。」QQ真狠，咒人瓜柴都特別文雅。
健：「我都唔知點講好，我可能已經傻咗。」
Q：「你一向都傻㗎啦，呢點我好清楚喎，係咪又俾女玩死咗，其實我哋都幫唔到你啲乜。」
健：「玩死就梗㗎啦，香港女仔古靈精怪冠絕全球…」
我：「不如直接啲，欣姐前日有無出嚟見你先。」
健：「有呀，佢中午就約咗我出嚟食晏，重發生咗好多事…」條友就好似錄口供咁，唔揼柒佢係唔會講出嚟。
Q：「主題係乜？分手？冷戰？定係當無事發生過？」
QQ一副看透世事嘅樣，你叫我點輕易入侵佢心坎。
健：「一開始佢係話分手，同我講我哋唔適合，話佢其實無嬲我，叫我當大家開心過就算。」
我：「其實係事實嚟吖，你哋各方面都相差太遠。」




Q：「但你實唔制㗎啦，道歉兼死纏難打係咪？」
健：「類似啦…但我有乜方法喎，佢跟本就無所謂。」
Q：「知唔知佢點解無所謂？佢根本就唔care，同你當拍散拖又好，當玩又好，當…都好，佢唔係真心鍾意你。」
健：「我而家知道…但我唔想放棄佢，我鍾意佢。」
Q：「何必鍾意一個唔鍾意你嘅女仔呢，盞攞苦嚟辛，而且你咁樣係會煩住佢，你唔係佢嗰類人。」
健：「感覺呢啲嘢唔到我揀㗎喎，我知道咗以前唔係真心鍾意佢，而家就更鍾意，我諗…既然同得我玩，佢應該有少少鍾意嘅，至少唔係討厭我。」
Q：「少少鍾意你，又少少鍾意第二個，到佢又flirt第二條仔嗰陣點攪？又鬧大架呀…」
健：「無得鬧…我又唔係佢男朋友，控制唔到佢。」
Q：「哈，你諗住點，等到佢玩夠然後揀你？」
健：「我而家都唔知，但…我認為，只要我真心對佢，無論以後發生乜嘢事都喺佢身邊，到最後…總有機會感動到佢而揀我，以後唔再玩。」