係同屋失友？定係同居勿友？只想同妳做普通朋友…🤦🏻‍♂️: K528

Miss出師不利，決定物色下一個受害者。
慕：「Miss，我相信妳都明白，呢啲咁尷尬嘅比賽永遠都係偏幫文科班嘅，通常佢哋班入面總會有一兩個鍾意出風頭嘅藝術家，至於我…就實在唔擅長為咁大個project做設計，如果係叫我去買材料或者剪剪貼貼定必全力以赴，所以，我認為呢個重任應該交返畀啲有美術天份嘅女仔。」
鄧：「咁…係邊個…女班長，妳認為點…」
U：「其實…而家嘅壁報板都幾實用吖，通告，人名表，時間表上面都有…」今次佢主動起返身。
鄧：「幫幫我啦，妳哋幾個好叻女㗎，我相信無嘢會難到妳哋，求祈整得㗎喇，等我有得交差…」
U：「咁…要整嘅話都可以整下嘅…」
易：「咪係囉，妳哋幾個嘅話，請出面廣告設計公司做都得啦。」
「哈哈，我夾唔起錢喎，不如去其他班call外援整？」
鄧：「好喇，總之你哋知道要整就得啦，繼續上堂…」
一直上到中午，重諗住唔知今日會唔會有人陪我食飯之際，個傻仔終於起身搵我…




健：「不如搵埋佢一齊食…」佢指一指QQ。
我：「吓，佢哋日日成班去食，你咪問下佢囉。」
健：「咁你同佢熟啲嘛…」
又係玩㞗我，講真除咗上年陸運會同幽蘭殺到嗰兩次之外，我都好似無約過個衰妹食飯，反而同韻婷就食過N次，原因係QQ同我都認為安全第一。
我咬完QQ耳仔，佢就同幾個姐妹打眼色，都幾順暢。
問題係女神去到邊都會俾人留意住，單頭出去食兼且跟住兩個男同學確實礙眼，而我哋謦嘅嘢又比較尷尬。
我：「約食飯嗰個，不如諗下食乜好？」
健：「我有啲嘢想講咋，食乜都無所謂，你哋話事啦…」仆街啦你，咁嘅德性想學人溝女…真係想講出口。
Q：「不如去你公司食？」
我：「吓？點解妳會得出呢個結論？平時又唔見妳食…」




Q：「酒樓最多先生食，所以就最少學生，另外嗰度唔係有兩間廂房咩，話晒都係你地頭。」
我：「可以嘅…其實嗰度啲學生餐係唔錯㗎。」
Q：「咁就行啦，我順便可以慳錢。」
講真一間屋邨酒樓可以有幾多人，個個阿姐都認得我啦，不過我去食lunch其實又無乜嘢嘅，一入去就已經見到一大枱先生喺度，時運高當睇唔到我就直鏟入廂房，阿姐見到係我當然唔會帶位，呢個鐘數好好彩得另一張細枱一對老夫婦喺度，我坐低彷彿重見到我琴晚鋪嘅枱布。