為了實現媽媽遺願，我成為了女兒國唐僧: K527

講真，九成學生唔會理你有乜會務社務，男嘅純粹關心有乜女昅，我諗女仔都會留意下有無男神嘅；話咁快就差唔多浪費咗兩堂時間，副校一聲放人就令到我哋有一個比起平時稍長嘅小息，返到課室阿健繼續維持一副修仙嘅狀態，我諗都係唔好主動理佢比較好。
Z：「妳忙完一大輪，而家還返班長個位畀妳…」
U：「嗯，可以吖…喂！前面嗰位，我睇到你耳仔郁㗎喎，你唔好扮聽唔到！」
我：「無啲咁嘅事，只係妳哋換班長關我乜事喎。」
U：「咁你聽朝識做啦，我唔要聽到同學投訴。」
我：「係，明白晒，謹遵主子聖訓。」唔止後面兩個，我左右前都聽到我點答覆佢，我諗佢哋對我答得咁順攤都覺得驚訝萬分，原因不外乎係喺邊度跌低就…
而絕對唔係畀面佢對超彈性靚pat，諗起就想咬。
V：「係呢，琴日個男人嗰件事你諗住點處理？」
我：「無嘅，我只係話畀佢知啫，呢個係我嘅責任嚟，至於點處理就係佢哋啲大人嘅事嚟。」
Q：「哈，妳等睇佢原來認錯人俾人鏟上天花板好過。」




鄧：「咁多位同學早晨。」真係一講孔融，就要讓梨。
「嘩！Miss早晨…乜咁早呀，小息好似未完喎…」出面有三個男仔喺度玩緊乒乓波棒球遊戲，如果唔係我俾啲女神夾住都想出去玩埋一份，而佢哋就俾Miss嚇親。
鄧：「無呀，早少少上嚟睇下你哋點過小息咋嘛，重想處理少少班務…你哋做乜停晒手呀，可以繼續㗎喎。」
「唔…喇，呢啲危險遊戲，妳平時無參與開，發生啲乜嘢意外就唔係幾好。」物理班最多男仔所以玩得比較癲，而啲女仔早就慣咗身手一流唔會用塊面嚟接乒乓波，另外通常會有兩個捕手喺啲女仔堆前面充當護花使者，製造一場鬧劇嚟撩佢哋幾句，就係小學雞嘅撩女方式。
其實班入面堆姣閪撈得唔錯㗎，同班長圈幾條仔有交流，同好樣運動叻外向啲嗰幾個又玩得埋，但我跟得女神就預咗同佢哋零交流，山頭主義呢啲嘢大家都明。
班主任佢呢排真係神神化化，等咗陣就所有人返晒位。
鄧：「各位親愛嘅同學，想問下點解你哋個壁報板重係空空如也嘅？欸…班會主席，唔知你有無意見咁呢？」
豬：「係奴才失職，未能擔此重任！願辭去主席一職。」
鄧：「欸…又唔係叫你整，你可以安排一下嘅。」
豬：「唉，我哋而家又無美術堂，中文又唔會再寫書法，重有乜可以貼上去喎？我識種花啫，妳唔係諗住叫我鋪塊草地上去呀，除非妳堅持想咁整啦…」




鄧：「而家唔係我想整呀，係學校有壁報板比賽，如果我哋班交塊白板出去其他先生實笑死我。」
豬：「請恕我直言，我相信好多先生都認為呢個比賽係學校最開心嘅活動嚟，因為無論整成點都可以為教員室帶嚟大量笑話，所以…請放生我啦。」