係同屋失友？定係同居勿友？只想同妳做普通朋友…🤦🏻‍♂️: K526

今日返嚟一見到阿健佢就雙目放空遙望涅槃，攪到我唔係好敢理佢，而細龜就睇落無乜分別，將宅男不動如山嘅特質貫徹執行，呢啲青春期嘅男仔實在好撚麻煩。
我：「見你無搵我，應該無事？」
健：「我都唔知。」佢望住禮堂頂句校訓同我講。
我唔認為佢想理我，所以我都唔理佢住。
再望下身邊嘅細龜，佢喺度回味緊同女王嘅對話記錄。
龜：「我知道佢係為我好，唔想我嘥錢…」
我：「人哋做演藝嘅，上網露兩手搵下零用錢，又點會係搵真愛喎，你太認真喇，大家都係求個開心就算。」
龜：「我明呀，但就係因為佢真心對我先令我更加鍾意佢，如果佢呃晒我啲錢然後唔理我，或者我就可以忘記佢…不過我決定聽佢話，要將個生活重心放返喺現實上面。」你又明條毛咩，但見佢好似開竅咁，睇嚟QQ嘅行動都算係成功為佢帶嚟正面影響。
我：「咁咪好囉，網上世界好多嘢只係睇表面，女王佢唔用真樣見你都係唔想破壞你嘅美好幻想啫，佢應該有佢嘅難處，你就聽佢話發掘下現實世界女仔嘅可愛之處啦。」
龜：「嗯，我決定要儲錢去日本睇乃木坂，就算屋企人唔帶我去…自己一個都要諗辦法去。」




我：「一個人飛日本？」
龜：「有乜辦法，佢哋唔飛嚟唯有我飛過去。」
我無能力理解佢心入面嘅現實，呢個都係無救㗎喇。
我決定自閉算，呢個早上不宜多言。
所謂嘅就職典禮，事前重有一堆頒奬活動；難以理解學校一年入面可以搵到咁多場合嚟頒奬，創造一大堆有名無實嘅奬項嚟吸引啲奬金獵人，話時話好似係得書券…今日嘅項目有，最佳進步奬、最佳服務奬、社區貢獻奬、多元發展奬…其實我都有進步吖，點解學校唔考慮下我，不過Miss咁鬼懶估計都唔會推薦我；唔緊要，因為我年年都攞開低調沉默奬，叻嘢唔到我攞，留班踢出校嘅又未輪到我，只不過今年…
跟住例牌先生講廢話，再到上年學生會講廢話，然後今屆學生會上去交接，換人自介同講廢話，而我就只係關注YY呢個女魔頭，唔聲唔聲俾佢撈到個位嚟做。
然後就到四社，一樣先由上年主席致辭同發表感言，今年唔會再有大波Bubble師姐搞活動同排啦啦隊，然後藍社換咗天王星做社長，相信大家又會對佢呢個唯一女社長有所期待，而且佢重靚過Bubble一截；最後比較攪笑係紅社嘅交接，瘟神上去講完一輪廢話感謝大家，文書同財政加埋其他中六落台，然後換咗QQ，幽蘭，重有兩個中三妹上台，台下又喺度嘩嘩聲，嘩乜鬼吖，有得睇無得食㗎！之後瘟神又再繼續希望大家多多支持為社爭光，至於左右女神自介當然神采飛揚極度流暢，而兩個中三妹妹就明顯比較怯場。