為了實現媽媽遺願，我成為了女兒國唐僧: K521

Q：「使乜羨慕喎，如果妳想要男朋友係一件非常容易嘅事情，最怕係驚妳遇到啲唔好嘅人。」
V：「唔係呀，我唔係想拍拖，我係想同男仔玩。」
Q：「妳講啲咁嘅嘢，俾其他仔聽到重得了嘅…好似對面呢條友仔咁，都不知幾想同靚女玩。」
V：「我唔係呢個意思，唔係講男女關係…妳知我咁多年嚟身邊都無男仔，所以無得睇佢哋打架，無低B仔喺我身邊玩東南西北同天下太平，聽唔到佢哋啲鹹濕笑話…」
Q：「你需要呢啲服務嘅話，對面條低B仔都可以滿足妳…」可惜嘅係我已經俾QQ湊大咗。
V：「點得喎，交叉仔係妳嘅。」
Q：「係鬼我，佢今年重要聽晒Uranus話，妳問佢借啦…」
V：「學校先係啫，佢哋又唔知你兩個住埋一齊。」
我：「不如…我摺兩隻青蛙畀妳哋彈吖。」
其實呢度啲嘢食真係幾好味，幽蘭同QQ一齊嗰陣係感覺到佢特別開心，而QQ亦會變細路女咗，睇住佢哋玩彈青蛙要壓住對面贏咗先有得食串燒…其實食得最多嗰個咪又係我。揸住張黑卡乜物質都可以買到，但比唔上幽蘭可以同我哋咁樣傻下傻下無憂無慮食一餐飯。QQ真係一個好叻嘅女仔，無論情況係點佢都會諗盡辦法令到件事變好，佢唔會在意俾我睇蝕，唔覺得我摸到佢對波係乜嘢一回事，無歧視我鹹濕嘅天性，無厭惡健仔嘅幼稚，亦無睇唔起細龜嘅毒腐宅，佢做嘅所有嘢都係為咗提升生活品質。




為咗平衡返少少，我就褪乜張凳令到我可以對住佢哋中間咁，幽蘭有時會伸隻腳埋嚟撩我，可能佢覺得咁樣好好玩，換轉以前我一早捉住佢隻腳除鞋放喺褲襠。
Q：「要報到嗱？早知我整個正經啲嘅樣啦。」
V：「打定底啦，佢落機實問我嘅，妳使唔使同條仔報到㗎？」平時佢文字報到多，我都服咗佢條仔嘅信心。
Q：「妳唔介意我咪send張合照過去益下佢囉，等我考考佢，到底邊個靚女啲。」
V：「妳咁樣即係明蝦我啫…阿爽你使唔使報到呀？」
報？報條春？我都唔知爹地喺邊個時區，阿健消失咗又未知悲喜，定係提早同班主任講有驚喜畀佢？
我：「報囉，見妳哋咁興奮。」
四十幾蚊杯嘅特飲實在爽，可惜QQ阻住我俾富婆包養。
Q：「喂！你做乜send你飲嘢個大頭過嚟？咪污染我部機呀！快啲收返張相。」
我：「咁…妳係我唯一報到嘅對像嚟吖嘛。」




V：「妳就唔好對佢咁衰啦，有乜所謂喎。」
Q：「點得喎，一陣佢哋幾個睇到我相簿又話我㗎喇。」
V：「其實佢哋幾個都知妳同佢好friend㗎啦。」
Q：「咁萬一我條仔睇到呢，安全起見都係唔好keep。」