thriXt Qantasy 純文字安眠之作 (New: - U2K - 一直上架): K519

Q：「無呀，勉強有張白金AE咁囉，叫做可以夜晚去北京樓食下特價菜，你估黑卡真係咁易申請到咩，況且個年費我爹地都唔會捨得畀啦…」
V：「唔好研究呢啲啦，其實又唔關我哋事嘅…」
好無謂咁研究咗一輪啲大人世界嘅事情之後，終於輪到我哋入座喇，雖則呢度係高檔商場但啲座位嘅擺法就同茶餐廳無乜分別，希望唔會太貴啦…QQ同幽蘭坐咗喺拍牆嘅位置，而我就當然一個人坐咗喺走廊位嗰邊。
V：「嗱，點菜呢個辛苦嘅任務就交畀你嘞，隨便嗌。」
Q：「唔好隨便呀，我哋…係會夾返錢嘅。」
V：「錢唔錢呢啲嘢就唔好同我計啦，又唔係我嘅。」
Q：「就係唔係妳先要同妳計，我唔想賣身嚟妳屋企。」
V：「唔係幾好咩…淨係嚟負責同我住，陪我玩咋嘛…」
佢哋全程一直手拖手，小弟我實在係無眼睇…唉，可能有朝一日我要搵Zilvia謦下，得佢先可以平衡到我嘅心理狀態；望下個餐牌又未至於貴到上天嘅，對有錢人嚟講算係好貼地嘅食物，而我就當然唔會無事無幹走嚟呢啲地方食，雖然佢個海南雞飯係好好食，但計埋加一夠我喺西九龍food court食三次喇。
不得不承認QQ嘅適應能力，同我一齊就做屋邨妹，黐返啲姐妹又變返貴婦，面對粉絲嗰陣就係職業女王…




點菜呢啲又唔會難到我嘅，加埋頭先做咗陣運動都幾肚餓，所以就…海南雞髀飯，海鮮福健炒麪，河粉燴牛肉，再加多盤雜錦串燒就啱啱好，嘢飲就一人一杯四季柑檸檬薄荷梳打，至於幾錢就名為我唔想計。
V：「交叉仔啊，你知唔知啊，頭先做完gym沖涼太多人，所以我同Queenie迫埋喺同一格沖呀。」
Q：「喂呀，呢啲嘢妳同佢講嚟做乜啫…」
V：「咁係…因為妳個心口實在係太好手感喇，舒服到…」
Q：「妳自己又唔係無，都唔知有乜分別。」
V：「點同，大啲，軟啲，滑啲，隔籬飯香啲。」
Q：「早知道我就讓妳入去沖先，寧願自己等下一格…」
V：「交叉仔，難得你同佢一齊住，一定要搵機會體驗一次呀，如果唔係肯定你會抱憾終生。」
Q：「黐線嘅咩，我點會無端端俾呢隻色狼掂喎。」
V：「真係無？一齊住咁耐掂下都唔得？」




Q：「只可近觀，不可褻玩，好似朋友咁掂到就有。」即係乜意思，QQ點定義乜叫朋友嘅掂？
V：「妳肯定？乜無啲積分或者印花系統去奬勵佢嘅咩，如果佢表現良好嘅話就益下佢咁。」