thriXt Qantasy 純文字安眠之作 (New: - U2K - 一直上架): K518

V：「咁點解妳得我唔得呀？呢個世界唔可以咁唔公平㗎喎，妳分明就係想自己霸晒啲好男人唔分畀人。」
救命…當啲女仔當你無到嘅時候，你先真正發現自己原來無可能介入佢哋嘅對話。
行咗陣我哋就嚟到今晚食晚餐嘅地方，有文華雞飯嘅餐廳，即係當初第一日見幽蘭我偷佢啲飯嚟食嗰間，餐廳名係個好長又睇唔明嘅英文我就懶得打出嚟嘞；同金鋪唔同，星期日嘅餐廳都係人頭湧湧，我哋大概要排六七張枱左右，好在呢間唔係日本餐廳咋，你知啲港女㗎啦！
V：「哎唷，早知頭先就嚟攞定飛啦。」
Q：「唔係呢條友要玩特務遊戲我哋一早食緊添啦。」
V：「嘻，唔好話佢啦，全靠佢我先送到條手繩畀妳咋。」我極度佩服佢可以將條成三千蚊嘅手繩講到好似中學生自己織嗰啲咁，而我相信佢可能當手上面戴緊嗰隻戒指同扭蛋扭嗰啲無乜分別，唔得！我唔可以在意。
我：「如果妳攞張卡出嚟，係咪下張枱就輪到我哋？」
Q：「喺度等位你search乜鬼黑卡呀！係咪想俾人綁架先安樂？」佢一嘢拍落我膊頭度。
我：「無呀，我睇緊點樣可以用張卡叫軍隊去沙漠救自己咋，同埋點樣係芬蘭食合味道杯麪…」
V：「其實係有可能嘅…不過呢啲鋪唔會攞嚟咁用，通常係walk in酒店餐廳，或者搵廚師整指定菜色先會用，你唔好睇嗰啲無聊故仔啦，本身攞到張卡嘅人…就可以搵到好多人去幫佢手，張卡只係多個勁啲嘅秘書台咁解咋，同埋所有服務會原單計返錢，當你搵佢買個杯麪，幫你搵嘢個人嘅人工，開車運送嘅費用，行政費會收返足你。」




我：「不過用呢張卡買嘢好似無乜著數咁…」唔好以為我唔知，我爹地掛喺外賣動物張卡買外賣係有4%回贈。
V：「唔係咁計嘅…呢張卡係令你消費而唔係令你慳錢，剩係佢個全球旅遊保險同埋任用lounge都喺返度，所以呢張卡年費好貴㗎…」
Q：「想問下係咪1881個lounge都可以去埋？」
V：「係呀，AE最高grade係呢張，無隱藏卡㗎喇。」
Q：「聽聞可以帶埋人去？」QQ兩眼發光，面相猙獰。
V：「哎吔，妳唔好咁啦…我都係同屋企人去過一次咋，嗰度本身就唔預招呼小朋友嘅，妳叫我點自己一個去噃，食佢嗰幾粒免費點心不如返出嚟嘥一百幾十食嘢好過啦，同埋，聽聞個lounge已經執咗…」
Q：「噢，竟然有你哋都養唔起個lounge…」
我：「右女神，請問一下，妳爹地以前無呢張卡嘅咩？」