thriXt Qantasy 純文字安眠之作 (New: - U2K - 一直上架): K517

姐：「請問妳哋有無儲K Dollar？而家可以幫妳入埋分…」
V：「唔使啦，其實我都好少行街…」
Q：「欸，我有嘅，麻煩等一等我開App…」
V：「嘻，果然妳先係專業嘅。」
姐：「咦，原來小姐妳都係金卡會員嚟喎，今次消費可以幫妳賺到四十八K Dollar，非常感謝妳哋嘅惠顧！」
買完嘢，佢哋手拖手跳下跳下咁離開間鋪頭，幽蘭將隻戒指戴咗喺右手食指上面，而QQ就戴咗條手繩喺左手，跟返平時嘅左右女神排列，其實我係跟嚟做乜？
V：「係喎！差啲唔記得，你頭先嘅任務成唔成功呀？」
我：「成功…好清楚咁影到個男人幫個女嘅戴戒指。」
V：「非常好，不枉我咁大手筆幫你去偽裝！」
Q：「吓？！妳唔係真係咁諗呀？邊值得幫佢啲無謂嘢…」




V：「有乜所謂，首飾最實在，戴成世重可以保值。」
Q：「唉，條友分分鐘認錯人㗎咋…不過，實在多謝妳。」
V：「講乜嘢客氣說話吖，惜啖我先啦。」
Q：「吓…惜…惜啖？」唔止QQ，跟喺後面嘅我都呆咗。
V：「唔惜得咩？我哋又唔係未惜過。」
Q：「咁我哋而家…已經大個女啦嘛…」
V：「妳大個女咋，我重係女仔嚟…家陣妳係咪剩係惜男朋友就唔再惜我喇，我已經唔再重要？」
Q：「點會喎，當然可以惜，只要妳想嘅話…」
幽蘭遞起塊面畀QQ惜一啖，然後佢又惜返QQ塊面一啖，最後嘴仔掂嘴仔咁啄一下攬埋一齊…我…被閃死了。
V：「嘻嘻，果然係我最好嘅朋友嚟！」




我：「妳兩個…會唔會稍微關心一下我嘅感受？」講就咁講，其實我兩個都惜過所以唔覺得有乜特別，不過個鏡頭就認真養眼，令我諗起啲AV情節。
V：「Queenie妳做乜面紅嘅！唔通妳真係鍾意我？」
Q：「一時唔習慣…太刺激啫，雖然我唔排除呢個可能性…」點算…我同QQ之間到底重有多少障礙…
V：「唔得㗎，雖然Queenie妳鍾意我嘅話我係會好開心，但係我哋之間係無可能，因為我係鍾意男仔嘅。」
啲女仔黐線㗎…可唔可以換返啲正常嘅畀我，感覺上YY先係最正常嗰個。
Q：「唓，妳都無同男仔深交過，點知自己係咪鍾意佢哋喎。」
V：「唔使㗎喎，我好細個嗰陣就知，讀幼稚園嗰陣拖住男同學隻手嘅感覺同拖住女同學好唔同。」好明顯妳父母安排妳去讀女校係一個非常正確嘅決定嚟。
Q：「唔好話我唔提妳，男仔好多都無好嘢㗎。」
V：「妳有拖拍就咁講，咁妳話我知妳男朋友係咪好嘢嚟吖？」
Q：「我諗…一般般㗎咋，同妳所想象嘅童話係唔同。」




V：「我無諗童話呀，我好現實㗎，妳日日對住呢個大魔頭都可以維持正常生活啦。」
Q：「點同，咁係因為我可以駕馭到啲壞男人。」