為了實現媽媽遺願，我成為了女兒國唐僧: K516

V：「唔緊要喎，我送畀妳咪得囉。」我都估到幽蘭會咁講，今次個店員真係有少少突兀，可能因為唔係出自我把口掛；妳估我唔想咩！我只係…絕對唔會用物質嚟換女仔嘅肉體返嚟！
Q：「點好意思喎，無端端收妳咁貴重嘅禮物…」
V：「邊係喎，妳由小學開始就成日攞啲零食同埋玩具嚟接濟我，重有啲化妝品呢，妳唔記得嗱？」
Q：「嗰啲…其實都係順便嘅啫，但我同妳嚟行街剩係得我買嘢嘅話咁樣好似唔係…」
姐：「其實我哋而家做緊promotion，如果買兩粒charme就會送手繩一條嘅。」不如講買晒成間鋪打幾折？
V：「哎吔，妳早講吖嘛，咁就梗係買多粒啦。」
Q：「唔使啦…我本身有鍊，同埋我淨係鍾意Kuromi咋嘛。」
V：「唔得喎，妳係Kuromi，咁我就係Melody，一於就買埋佢掛晒喺妳隻手上面。」我同店員都滴冷汗咁滯。
姐：「嗱，呢粒就係同系列嘅萬聖節Melody，頭上面一樣有粉紅色頭髮，重有兩隻角添。」水口就水口啦。
V：「嘻嘻，無問題吖，一樣都係咁可愛。」




Q：「不如一人一粒？或者交換戴？點可以送晒畀我喎，咁妳咪乜都無囉…」
V：「邊個話我乜都無，我自己可以買㗎嘛，就要呢隻Kuromi戒指啦，咁妳就可以成日都黐住我。」果然有錢就係任性，鍾意乜都可以話買就買。
姐：「小姐妳鍾意呢款戒指實在係太好，不過留意返戒指嘅重量會比較重，所以價錢可能會貴少少…」貴就貴啦，唔敢講咩？到而家先嚟諗呢兩個妹有無錢埋單真係…
V：「唔緊要啦，都係跟返飾金價嘅啫係咪？我就要呢三樣啦，麻煩跟返我呢隻手指嘅size。」
姐：「咁請問妳係畀現金定…」
然後幽蘭就迤迤然咁攞個銀包出嚟…
V：「請問你哋收唔收AE？」佢手中係一張黑色卡仔。
姐：「當然收！大小姐請麻煩等一陣，我即刻去幫兩位包裝全新貨品呀下，好快…」攪乜鬼…明明之前咁鎮定。
Q：「哎吔，妳嚇親人哋喇。」
V：「做乜喎，買少少嘢唔可以轆卡嘅咩？」




我：「張卡好巴閉嘅咩，係咪可以當聖旨用？」
V：「唔關我事㗎，附屬卡嚟，又唔係我自己申請。」
Q：「懶得同你解釋，呢啲嘢唔知好過知。」
妳兩個貴婦…算，鬼叫我係寒酸屋邨仔。
話咁快店員就攞咗啲新貨出嚟，重有幾條唔同顏色嘅手繩，QQ當然揀返佢最鍾意嘅粉紫色。
V：「唔使包喇，我哋諗住即刻戴嘅。」然後店員就攞部機轆卡，兩個妹好似小朋友玩LEGO咁戴上佢哋嘅新玩具，只不過啲價錢就幾何級數咁。
我望一望個銀碼，八千有突…四位數啫。