為了實現媽媽遺願，我成為了女兒國唐僧: K515

我：「欸，佢兩個好似喺度睇緊鑽戒呀…」
Q：「唔使同我講，既然你咁為Miss設想，搵啱時機就過去八下啦，我同幽蘭要行街街呀！」
V：「嘻嘻，閃爧爧好靚靚呀！」我得重申一次，黃金其實唔算係太有用嘅金屬嚟，但可以用嚟食女。
店員話咁快就攞咗一盤卡通金飾出嚟，又係乜都有啲，但同上次唔同呢間差唔多全部都係金色。
Q：「呀，呢粒charme好得意呀，Kuromi頭頂粉紅色！」
姐：「係呀，呢粒係新返嘅萬聖節系列，我哋幫好多隻唔同嘅Sanrio角色設計咗一粒生動嘅charme，妳可以留意下上面重有隻角嘅添…」大佬，粒嘢咁細粒可以有幾萬聖節呀，至於上面隻角同模型水口剪唔齊無乜分別…
坐又唔自在，行又唔自在，我決定打個白鴿轉再望下條仔搞緊乜，可幸成個場嘅店員似乎都唔覺得我係潛在客戶由得我自己周圍睇無行埋嚟，可能以為我只會係埋單嗰個掛？我都想呀…奈何我實在無呢個能力。
行下行下我同目標只係剩返四個飾櫃嘅距離，同時間將我撓埋手放喺條腰隔籬嘅電話打開錄影模式，我慢慢經過佢哋，見到個女仔喺度試緊戒指，條仔重捉住佢隻手幫佢戴同埋除，今次…睇怕都可以結案咯。
去到呢個stage，就算唔係結婚都已經係訂婚啦，重講乜嘢拍拖噃，而唔拖手可能只係一齊得太耐習慣咗，正如我而家都唔會覺得拖住QQ隻手有乜咁特別。
我好清楚部電話已經記錄低我需要嘅嘢…因為以前…唔講喇，反正我而家大個model喺屋企隨時有得影，而且就算我話想幫幽蘭影佢都應該會答應，放心，唔係細蚊啲扑嘢片嗰種…




姐：「如果鍾意就認真唔使考慮啦，入門金飾以千幾蚊呢個價位嚟講已經好平，同埋呢啲特別款過完節我哋未必再造㗎喇。」
V：「係囉，鍾意咪買囉，難得同我出嚟行街。」
起因係我生事佢先會走入嚟睇，我知佢一早知有Kuromi金飾，但就唔肯定佢係咪真係想要，但就算好想，都肯定佢唔會捨得用千幾蚊換粒咁嘅嘢，何況佢銀包可能千幾蚊都無，應該話成副身家…可能要等細龜份禮物到數囉；而我自己銀包都無，就算家陣因為有女喺身邊所以會準備定可能都係得三五嚿，不過至少EPS搞得掂嘅…
Q：「其實我想諗下先嘅，金飾始終唔係平嘢嚟…」我明白佢心入面嘅難受，俾著以前一早唔使諗買咗。