為了實現媽媽遺願，我成為了女兒國唐僧: K489

踢波嘅嘢其實無乜好講，但出波嗰陣就真係好爽，而阿健經過一個暑假嘅操練之後變得比以前硬淨好多，有時喺前場都會同對面嘅後衛炒埋一碟，畢竟佢而家係個可以一日大戰大學生姐姐四次嘅男子漢嚟…如果真係嘅話。
好彩只係卜到一節九十分鐘，上下場打八隻好快就完咗，如果唔係咁大個場又無得換人實跑死小弟都似。
我：「使唔使咁勇呀，小心撞傷第三隻腳聽日無得大戰…」其實我覺得腳呢啲好閒，腰比較大鑊。
健：「講呢啲…佢聽日真係搵我先算啦。」
我：「我覺得欣姐係個有口齒嘅人嚟嘅，正所謂希望在明天吖嘛。」其實我係比較相信欣姐對QQ嘅承諾。
健：「唔好提佢住喇，去食嘢先。」明嘅，如果等到聽晚佢都收唔到欣姐嘅訊息，佢又會再崩潰一次，但偏偏世上就係有好多呢啲賤男女，鍾意攪到自己另一半一次又一次咁輪迴，而啲痴男怨女又永遠唔會醒覺。
行下行下就嚟到樂富，你問我做乜要過嚟？其實我都唔知，我哋呢啲無所事事嘅中學生好鍾意做完一樣嘢就向某一個方向繼續行落去，縱使係漫無目的…我諗，或者係貪呢度個UNY food court多嘢食揀又唔太貴掛。
經過樂富廣場中庭，呢度有好多落地玻璃嘅連鎖食肆，例如大家樂嘅好朋友一粥麵同米線陣，講真就麻麻地吸引…
我：「咪住！你望下入面嗰個背影！」
健：「做乜呀，乜有靚女咩，無呀。」




我：「右面嗰張枱呀，似唔似我哋個班主任？」
健：「嗯…係有少少似，咁又點？」
我：「佢對面有個男人喺度呀！」
健：「吓，佢係成年人嚟，同男人食飯有乜出奇…」
我：「嚟，我哋褪過少少，應該就可以見到佢個側面…嘻嘻，重唔係佢嚟，喺度食飯食得咁開心。」呢度係一間無乜謂嘅東南亞餐廳，佢同一個四眼哥仔喺度撐枱腳，望落都係三十歲唔夠咁，而Miss就好似笑口噬噬。
健：「咁係囉…我哋行啦。」
我：「點得㗎，作為學生我哋好應該關心一下自己嘅班主任。」等妳家訪我騷擾得我哋咁開心吖嗱。
健：「有乜特別喎，人哋先生嚟㗎，對面位男人都好斯文，唔會有你想睇嘅嘢囉，野戰都唔會走嚟大商場…」
我：「總之喺度睇下佢哋有乜搞作先！」
健：「你有無無聊咗啲呀，人哋正正經經食飯可以攪乜嘢花樣出嚟，你自己都要食飯啦…」




我：「你第一日識我咩？我以前日日都咁無聊㗎啦，你知唔知我見過幾多對學生情侶喺啲公園度幽會？」
健：「頂你，你自己咪又係一份子嚟…」
我：「總之喺度等一等先，睇下佢哋一陣會去邊，橫掂你都係想求祈搵啲嘢做分散注意力，咁咪啱晒囉。」