為了實現媽媽遺願，我成為了女兒國唐僧: K458

「呵呼…呵呼…對唔…無事嘛…sor…」原來係一個女仔，嗰三個中嘅其中一個，亦都最唔起眼。
點解會炒到咁應？因為佢唔識游水所以就打橫游，而佢兩個朋友都唔係叻，但就貼住條邊游掉低咗佢。
講到尾都係因為我想昅嘢，所以只係同佢哋隔咗一條lane，如果我喺正中間游就應該無事嘅…
我：「死唔去…如果打乜啲我應該已經沉咗底。」
「對唔住呀，無心㗎，明明見到前面無人…」簡單嚟講，即係等於過馬路衝紅燈話前面明明無車結果被撞飛幾米遠，如果佢係仔嘅話我應該已經屌㞗咗佢。
我：「算啦，唉，妳咁攪法有排都學唔識啦，掙扎咁…」
「欸…因為細個無學，而家好似有啲遲…學極都唔識。」
我：「游水呢，乜式都唔重要㗎，因為只係影響快慢，最緊要係浮吖嘛，浮就可以留喺水面，可以慢慢呼吸，所以妳要吸大啖氣等個身體浮起，妳亂咁搲水只會攪到妳無晒氣再沉埋。」
「咁即係應該點？」好多人講過睇文字係無可能學得識…
我：「你可以試下吸一大啖氣再瞓喺水上面就會浮。」




「但我瞓落去第一下咪沉囉，除非有人托住我。」都雞同鴨講，好明顯游水係唔可以用把口教要用身教。
我：「我唔會掂妳，港女好恐怖，唔想俾妳告非禮。」
「唓，三唔識七先唔會俾你掂呀，你係中學生嚟？」
我：「係呀，唔通小學生咩…咪玩啦。」
「但係你咁高，所以先問下你咋嘛。」我唔知佢點定義，總而言之成人池邊最淺一點五米，我可以輕鬆自如露埋心口企喺度，而佢就浸到口咁滯，估計重要踮高緊腳。
我：「如果生得高可以入U嘅話，估計我唔會再溫書。」
「唔係中學生都唔一定大學生嘅啫，可以係雙失青年。」
我：「…我中四㗎咋，妳呢？」
「中五，大你一年。」
我：「師姐妳好，我諗我哋同年嘅啫。」




「姐你個頭，你係repeat仔？」
我：「唔係，妳當我係唔知贏在起跑線定輸在起跑線嗰堆啦。」唔好問我點解可以咁流暢咁同個陌生女仔製造咁多無營養嘅對話，識QQ之前，本身我喺條街就係咁。
「喂，你係咪喺度昅緊我兩個friend游水？」好明顯啦…
我：「講起就把幾火，我唔記得帶個沒鏡嚟攪到無嘢好昅，不過正確嚟講係昅緊妳哋三個，包埋妳嘅。」
「吓，我你都昅，究竟你係大近視定係品味咁差呀？」
我：「唔係吖，妳幾可愛呀，感覺上乖過妳嗰兩個朋友。」對住啲平平無奇嘅女仔，讚佢乖通常都唔會錯，因為佢哋無乜資格曳，雖然現實往往係另一回事嚟。