為了實現媽媽遺願，我成為了女兒國唐僧: K415

我：「你…不如攞枝螢光筆出嚟一路睇一路間重點？」
東：「唔制，間到成本書都係螢光會俾人話乸型。」
我好想揼鑊佢甘，但佢講嘅嘢其實不無道理…
我：「你不如睇咗頭兩條題目先，見你咁耐都未寫過嘢…」閱讀理解唔夠時間做嘅主因就係當故仔睇。
過咗一陣佢終於落筆。
我：「不同意，他沒有錯…你唔係諗住咁樣七粒字交呀？你不如直接寫粒否字交咪算囉。」
東：「都想㗎，橫掂有填嘢就叫做咗功課㗎啦。」
我：「而家唔係要剩係有得交呀！你咁樣答題會無分㗎，到時盞你做改正嗰陣咪又要做多次…」
東：「到時抄啲答啱嘅同學咪得囉。」
我：「你咁樣邊學到嘢呀？！唔得，要再答過，喺內文搵返發生過乜嘢事，引用完再加以形容，最後解釋…」




幾經辛苦，終於做完兩篇閱讀理解…慘過我寫兩篇中作。
我：「俾你抖五分鐘啦，然後就做埋中史作業佢。」
東：「姐姐，其實妳嫌麻煩嘅話可以寫個答案出嚟畀我抄落去都得㗎。」
我：「點得呢？重點唔係個答案而係個過程呀！」
東：「咁食古不化，人哋大學生姐姐都唔似得妳咁。」
我：「咁佢係點，係咪教你教得太hea俾人炒咗？」
東：「咁又唔係，佢無乜情緒嘅，都係照教，因為佢多數得夜晚先得閒，為咗就佢一係要好夜先食飯，一係就我同媽咪要食咗先，同埋我阿媽想趁呢段無王管時間搵人睇住我，於是就想換過個Miss。」
我：「佢呢個決定幾好吖，等你唔好嘥晒放學啲時間。」
東：「但我唔鍾意，妳惡死過佢。」
我：「邊係惡喎，我都係為你好咋，讀唔成書第時好辛苦㗎，你媽咪都係擔心你。」




東：「讀得成書又點，咪又係要返工，新聞都有講醫生護士一樣做到死，而且好多人有抑鬱。」
我：「好好好…我唔咁迫你，你之前Miss乜都由得你？」
東：「咁又唔係，佢同我講過當有一日我想讀書嘅時候就會自己讀㗎喇，同埋讀書係美德，知識係資產，不過而家嘅我並唔係太想讀書。」
我：「佢又會咁都得嘅…咁你實係好唔鍾意我定喇。」
東：「都唔係嘅，妳靚女啲又後生啲都唔錯。」
我：「關乜事喎，你點讀書同我靚唔靚女完全無關係。」
東：「梗係關啦！我幾驚阿媽會幫我換咗個阿sir返嚟呀，咁到時我實完全無心情做功課，好彩…嘻嘻嘻。」
我：「你咁樣望住我想點呀，你好細個㗎咋！」
東：「我知道…以前Miss都係咁講，叫我唔好留意佢，話會影響我認識身邊嘅女仔，同埋其實佢都好靚女。」