為了實現媽媽遺願，我成為了女兒國唐僧: K414

東：「呢頭有好多好嘢食㗎，妳有無乜嘢想食呀？開聲就得，我可以請你食。」
我：「我唔需要，你得十分鐘㗎咋，好快啲買完就走。」
呢度係佢學校對面嘅一間車仔麪鋪，新蒲崗啲嘢的確係幾平，個死仔包買咗一包燒賣腸粉，再加一碗三溝淨餸…
東：「哎吔，妳唔好黐咁埋啦，俾同學見到笑我喇。」
我：「你一早返屋企先咪無呢個煩惱囉，重有…我企喺你隔籬應該點都唔會失禮你囉，唔該。」
東：「唔係呢個意思呀，一陣揚開咗啲女仔唔理我點算喎，妳重要著住校服㗎，大佬。」
我：「你…唔係諗住…人哋望到我哋會覺得有可能呀？」
該煨…我高佢一個頭有多，而家啲小朋友到底諗乜㗎？
東：「就係無可能先大鑊，我唔想俾人笑呀。」
我：「呵，你唔係諗住食埋啲咁嘅嘢就可以快高長大呀？」我順手將個手踭晾咗喺佢個膊頭上面。




東：「茜旎姐姐，妳真係好過份。」
我：「你再唔快啲返去做功課就更過份都有，信唔信我直播你而家嘅所作所為畀你父母睇？」
終於，佢攞到佢嘅食物，然後一齊行返去，佢好似極之唔想企喺我隔籬咁一直加速行喺我前面；其實呢段路都唔算短大約兩個巴士站，無端端行咗一個來回實在好無謂…
呢度係一個兩房單位，得一個浴室，實用面積五百呎多啲，以市區行到去MTR計大概值一千萬樓上…
我：「哎，你可唔可以食快啲呀，或者一路睇書一路食？」呢個死靚仔分明喺度揼波鐘，想攪到屋企人返嚟都未做晒啲功課就安樂嗰種。
東：「咁樣會影響消化唔健康㗎，你要唔要食一甩呀？」佢拮咗粒燒賣戙喺我面前，我剩係好驚啲豉油會整污糟條校裙，到時實聽我想切開佢幾轆。
我：「唔食，我嘅職責係嚟教你做晒啲功課。」
東：「又嫌我食得慢，如果妳幫手食啲咪可以快脆啲。」
我收返之前講嘅嘢，我唔想識到中一嘅阿爽，因為好難唔打扁佢…但點都要忍住，始終我係有錢收。
我：「喂，唔准做中史作業先呀，做閱讀理解！」




東：「點解呀，都係功課嚟啫，做乜揀三揀四？」
我：「而家分明係你喺度揀啲易嘅嚟做先，中史作業咁簡單，是但望書都有答案啦，你梗係做咗啲要我教嘅先！」中一頭一個月中史教乜？耕種係乜氏，打魚係乜氏，皇帝同乜尤喺乜地方大戰…嘔血。
喺我嘅淫威之下，佢終於死死地氣咁攞咗本閱讀理解出嚟，但見佢望住一個四方框嘅字，根本唔知佢睇緊乜。