為了實現媽媽遺願，我成為了女兒國唐僧: K365

就係咁，喺呢個空曠嘅密室得返我同佢兩個。
無晒其他人嘅觀戰佢變得更加狠，一下凌厲嘅眼神之後扭腳轉腰彈起…如果真打我一係閃避，一係快過佢抽擊落佢凌空嘅身體等佢發唔到力，奈何而家只可以判斷佢肢體嘅流動嚟分辨要出乜招，係half spin hook？定full spin turning？定air back kick？轉眼間一下三六零側踢命中我嘅左臂靶，乘勢壓落我嘅心口，成隻手臂可以話震晒…
我：「使唔使出盡全力呀！邊有人敢同妳打…」
要知道呢啲空中kick，你條腰唔夠力轉速唔夠快就係花拳繡腿，而只有速度角度同時間夾得啱先可以化做打擊力…
佢無答我，落地扎馬之後即刻接下side kick…
我唯有拼實兩個臂靶硬接呢下側踢兼且抽腳向後褪…
點知係一下跨步牚到盡嘅硬踢…要知道…呢啲唔收力嘅攻擊如果打唔正目標係會整傷自己，而且遇到高手係有機會俾人用鎖扣招反制；總之，佢呢下踢到我失去平衡成個屁股向後跌咗落地…好彩木地板唔太痛。
U：「我唔出盡全力，又點教識你分乜叫暴力。」
我：「得得得！我拜妳為女俠好未？武術又好暴力又好，饒我一命先，俾我抖返一陣唔該…」
我坐喺板凳上面，兩隻手重係唔受控咁輕微震緊，而佢隻大髀都有差唔多嘅反應，主要原因係啲肌肉由劇烈輸出突然之間轉為冷卻，神經同副肌肉組嘅自然反應嚟。




我：「我認妳係好犀利喇，唔好再咁不顧一切啦…」
U：「如果唔係我咁努力，又點超越一般男女身體上嘅差別，所以…我絕對唔接受你之前嘅講法。」
我：「知喇知喇，但我同妳級數都唔係差好遠啫，妳唔好諗住練到可以打贏The Rock就得。」
U：「你不如話綠巨人吖，都搵嚟講嘅。」
我：「第一次孤男寡女共處一室，我有啲驚會有損失…」
U：「收皮啦你，認真問你，如果我哋真係打，你覺得我係咪一定贏梗？」
我：「世事無絕對㗎喎，我只會話…我未必一定輸…」
U：「咁點解你嗰日要讓我？」
我：「讓？無讓呀，妳技術咁好，我輸係應該㗎喎。」
U：「我唔覺得你嗰日有認真想要贏我。」




我：「我諗唔到有乜嘢好方法去贏妳，所以咪輸囉。」
U：「即係唔使認真先贏到我就贏，如果唔係就輸都無所謂，係咪即係咁？！」
我：「我覺得…如果一個男仔要不擇手段先可以贏到女仔，咁佢其實已經輸咗，加埋唔想整傷妳…」
U：「頂你呀！咁同讓我有乜分別？」
我：「咁躁做乜啫？世界所有武術比試都有留力以技術取勝㗎啦，咁自然就有走盞，點可以同生死決鬥比較？」
U：「屌你呀！講到尾係因為我係女仔就讓我！」