為了實現媽媽遺願，我成為了女兒國唐僧: K364

然後，我就喺槍林彈雨之中入面過活，係咁俾幾個靚妹輪姦；驟眼睇落天王星喺佢哋之中係最大嗰個，亦都最大份，另外四個我當係小六中一二三咁啦，啲拳腳無乜傷害性，就算佢哋踢低咗中大髀都未至於好痛，唔好再乜刮中中間就得，小雞係無防御力嘅。
而佢哋都襯返呢度嘅環境，就係普通女仔咁，樣唔係話好女神，感覺亦都唔算富貴，而天王星就無乜對我郁手；呢份苦差對我嚟講又無乜嘢嘅，打下擋下係啲好簡單嘅事情，戴住呢兩嚿嘢…應該話就算真打佢哋要打傷我都無乜可能，我用手格佢哋腳分分鐘佢哋重傷。
俾佢哋輪咗成粒鐘終於有得抖下。
我：「哎，其實做乜要我嚟做靶嘅？」
U：「咁都要問？如果你唔喺度平時咪又係我做靶。」
我：「嗰邊咁多師兄，是但叫一個嚟幫手都得啦。」
U：「唔得㗎…師父有令，男同女唔可以對打㗎。」
我：「打就梗係唔得啦，幫手練下應該無問題掛？」
U：「唔得呀，以前發生過啲唔開心嘅事，所以…總之你唔好問啦，唔得就係唔得。」
我：「我大概明嘅…但，點解我嚟幫手就可以先？」




U：「因為你唔係佢弟子嚟囉，你敢亂嚟我第一個打死你，等你以後對住啲女神有得睇無得用。」
我：「不朽都無得用㗎啦…咁佢唔收女徒弟咪得囉。」
U：「呢層…佢都要收學費嚟維持成本，執笠邊緣㗎喇…」
明嘅，呢啲咁貼地又實際嘅道場，邊夠啲中產商場嘅呃鬼食豆腐小朋友興趣班嚟，人哋多個零一樣有客。
我：「其實裝沙包嘅話咪唔使搵人做靶囉。」
U：「沙包好重好煩，要安裝亦都唔平，硬得滯唔好打，技術唔夠有機會整傷自己，角度又無得調較。」
簡單而言，打死我絕對係比較化算。
之後我哋繼續練，望住隔籬班師兄弟喺度練功都覺得幾好玩嘅，點都好過我喺樓下同人打架；佢哋個師父大約六點左右就唔見咗人，感覺上佢都無乜做過嘢，十足十邪教教主又或者恐怖份子嘅精神領袖咁，人在心在坐喺度就掂…
而其他人亦都逐暫離去歸家食飯，包括幾個小妹妹。
我：「天王星妹妹，我哋係咪可以收工喇？」




U：「收乜嘢工呀？我都未練，唔該你企穩啲呀！」
呢個女人真係當正我係仇人咁打，佢啲精力好到吖…一下又一下嘅直拳同埋手刀打到我塊靶啪啪聲，而我亦都要不停閃身咁去就返佢個位…大佬，無男仔想聽到妳身體發出呢種暴力嘅啪啪聲囉。
「我走喇，交畀妳鎖門。」係一個大師兄…