為了實現媽媽遺願，我成為了女兒國唐僧: K361

呵呼…嗯呼…「叮噹…鈐叮噹…哆啦噹…」
我：「嘩！搭八喇！仆街喇！死人鬧鐘…QQ妳做乜…」
我望一望，成間屋得返我一個…然後我見到枱面有張字條，寫住QQ幫我褪後咗個鬧鐘等我瞓多啲；右女神妳真係天使嚟㗎，妳竟然肯早啲起身返去代替我開門，但係妳無同校務處登記借唔借到匙㗎，不過妳同女班長咁熟實無問題嘅…太好喇，重可以慢慢刷牙。
返到去，QQ當然已經喺位，而且…
Q：「點呀！今朝幫你開咗門，諗住點報答我先？」YY聽到佢講又喺度暗笑，都唔知呢個女人平時喺度諗乜。
我：「大家咁熟重講呢啲…點解…個班長牌會喺妳件衫…」
Q：「鬼得閒同你熟呀，重爭幾個名自己點埋佢啦，如果你唔乖乖哋做嘢嘅話我就等你見識下乜嘢叫暴力女班長。」
Y：「Uranus呢幾日搞社務會比較忙，然後你個女神猜輸咗，就係咁嘞，你都係要乖乖做嘢。」
的而且確，變成幫QQ做嘢我嘅心情會好好多。
前面嘅阿健繼續一副食咗春藥咁嘅樣，佢隔籬嘅YY同思韻當然feel到有啲唔對路，但就唔會理佢。




到咗小息就係我收課後，班會費同社費嘅時候，唉…
我：「Louis，如果可以嘅話不如交埋啦，爭你一個咋…」
以前我永遠係拖得就拖嘅一個，到而家就體驗返個痛苦…
易：「琴日先話收，過咗一日咋嘛，咁急做乜呀？」
我：「收齊可以了咗件事啫，你都唔想我聽日又嚟煩你㗎，如果有咪攞出嚟囉。」
易：「咪話咗應該無囉！你鍾意煩我咪日日嚟問一次！」
U：「乜嘢叫應該呀？你唔畀面佢即係唔畀面我㗎咋。」
雖然佢個班長牌過咗去QQ度，但係完全無損佢嘅霸氣。
易：「嗱，睇到啦，滿意未呀？得張五十蚊咋，唔怕煩咪收住一半先囉！唔係我窮呀，而家使錢重邊使用現金咁落後㗎，梗係碌卡儲分㗎啦！白金卡收唔收呀？」佢真係攞咗兩張卡出嚟，一張銀色一張黑色…哦。
U：「呢個年代重邊使用實體卡㗎？有無電子錢包呀！我哋好多個都有得收㗎喎。」




我：「其實PayMe我都有嘅，如果你有餘額嘅話…」
慕：「欸，一人少句啦…嗱，我啱啱有張一百蚊紙可以出住先，你收齊一陣可以攞落去喇…」
你個男班長早啲借畀佢咪好囉…不過易同學個樣明顯就唔想班長幫佢，睇嚟都係想製造麻煩畀我…明嘅，我諗的確無乜男同學睇我順眼。
V：「乜白金卡會威啲嘅咩？雖然我無…」
Q：「哎吔，妳唔好用妳嗰啲同佢哋比啦，兩回事…」