為了實現媽媽遺願，我成為了女兒國唐僧: K362

坐喺佢哋兩個中間嘅我，實在夠晒百般無奈。
除咗食飯嗰陣阿健又係笑口噬噬之外，無驚無險又到放學，咁我都好清楚自己要做返啲乜嘅。
我：「Queenie，畀條匙我鎖返門得喇。」
U：「唔使，今日嘅你有其他更重要嘅任務。」
我：「吓…唔好掛，難過開門鎖門嘅嘢我搞唔掂㗎。」
U：「叫得你做就實搞得掂，Queenie妳無嘢用得著呢條友吖嘛？」
Q：「我…有乜嘢要用佢喎，妳隨便使佢就得。」
U：「你放咗學應該得閒㗎啦，聽日你先要打橋牌。」
我：「得唔得閒呢個問題，係視乎我要做啲乜嘅啫…」
U：「你認為你有得揀咩？唔該你返屋企換套運動衫落嚟學校門口等我，廿分鐘好到喇，我而家去搵先生先。」講完佢就出咗課室，睇嚟真係好鬼忙。




我：「想問下，呢個女人要搵我搞乜？」
Q：「我點鬼知呀！佢剩係問我你放咗學得唔得閒，我咪答佢我點會知，你日日都無所事事㗎啦。」
Y：「佢驚阻住你兩個拍拖呀。」
Q：「黐線！唔好亂講，我有男朋友㗎喇。」
V：「如果你服兵役，妳就練兵，咁算唔算拍拖？」
Q：「無呀，唔好講啲容易令人誤會嘅嘢呀！」
Y：「總之你死咗條心，女班長係唔會同你拍拖㗎喇。」
V：「Yvonne妳係講邊個女班長先？」
Q：「夠喇！總之你打輸係抵死，好好服侍人哋啦。」
我：「我有啲驚呀，佢唔會打死我㗎？」




Y：「唔會，但就綁起你，炮烙到你下面變麥炸雞。」
V：「好似幾好玩喎，如果唔使返屋企都想去觀禮。」
Q：「你唔想俾人打就快啲換衫啦，我救唔到你。」
喺我俾人圍住調戲嘅時候，Zilvia就喺後面安靜咁睇戲…
呢班女唔係人嚟㗎，暴力女班長，圓方世界女，牛津道仙女，奧海城淫娃，彼拉多主人…有邊個係正常？
雖然唔想應酬天王星，但鬼叫佢係女人咩，所以我都換返件企理啲嘅運動T同條跑步長褲，我想加個護陰添，但我又無呢啲嘢。
我：「妳覺唔覺得…我咁樣接妳放學好奇怪？」
U：「咪咁多廢話啦，係人都知乜事，講都講幽蘭搶姐妹隻兵先啦，唔通講我咩，幫我搦住袋嘢。」
呢個硬掘掘嘅女人，對住佢真係好無癮，明明都算係美人一個嚟吖…佢帶咗我去搭地鐵，全程都無同我講過一句嘢，呢個鐘數車廂入面都有啲單丁位但佢就完全無諗過要坐，扎住馬企到直一直咁，去到土瓜灣就落車。
上咗地面就沿住馬頭圍道行，呢條街同女神嘅相性可以話撞到天崩地裂，但就幾襯呢個暴力女嘅…嘈吵嘅街道，汽車嘅廢氣，太陽嘅正射，喺佢眼中都係非常自然不過。




我：「喂，妳…諗住帶我去邊呀？」