thriXt Qantasy 純文字安眠之作 (New: - U2K - 一直上架): K303

Q：「呢度無，要去周生生，但唔好諗無謂嘢。」原來佢一早已經知，可惜我實在係能力有限。
Q：「你睇下，我哋揀咗呢款你覺得靚唔靚呀？」
我：「靚…係銀嚟嘅？」係一隻著住衫嘅史露髀。
Q：「唔係，咪你頭先問嘅白色黃金囉，重有純金鑲邊，件衫上面呢啲係藍寶石，耳仔上面係黑鑽。」
我：「乜鑽石唔係透明嘅咩？」乜giant structure…
Q：「咁碳係乜嘢色㗎？」
我：「黑色囉，即係呢幾粒係碳嚟？」
Q：「鑽石本身就係碳嚟㗎啦，返去自己溫。」
我：「咁白金係咪會平過純金？」
QQ反咗下白眼，未答我個姐姐已經返咗嚟。




「小姐妳好好彩呀，呢款頸鏈好好賣所以淨係返咗一隻就無擺display，如果妳要現貨就係我手上呢條。」佢打開兩包珍珠棉，入面就係包住新鮮熱辣嘅頸鏈同吊墜。
然後QQ就金睛火眼咁鑑賞隻狗仔，彷彿想燒死佢咁。
Q：「無問題，我就要呢條鏈啦，請問係咪無折？」
「呢款好好賣所以無做特價，定價四千有找，如果小姐有信用卡嘅話就可以儲分同申請免息分期。」我聽到都打咗個突，妳哋啲生日禮物其實係咪有少少離地呢？
Q：「咁唔使喇，現金就得…」
「多謝，咁我而家幫小姐妳穿起佢入盒…」
睇住佢喺銀包攞四千蚊出嚟，我終於明佢點解琴日請幽蘭食飯都要問我攞錢…sales收完錢之後就意味不明咁望住我微笑將貨品交到QQ手上，再非常殷勤咁送我哋離開鋪頭，臨走重叮囑我哋要多啲光臨…
Q：「嘻嘻，隻Snoopy好得意呀！」一出去又打開嚟睇…
我：「又唔係自己嘅都咁開心嘅？」
Q：「點同喎，係我買嘅，買嘢本身好開心㗎嘛。」




我：「好抱歉，我幫唔到妳更盡情咁購物…咁…我哋而家去食嘢定點？」
Q：「買完禮物之後已經好窮，無錢食飯嚕。」
我：「傻瓜，妳重有我吖嘛，飯就梗係要食㗎啦。」
Q：「得，無問題！你跟我嚟啦。」然之後佢就捉住我行，唔通佢知窿路喺呢個大商場可以有乜平嘢食？據我所知呢度都有大家樂同大快活嘅，不過又好似灰得滯，附近重有MOS漢堡，IKEA肉丸可以考慮下，或者再行遠啲都有屋邨…
點知佢捉我去百佳買咗枝一點二五lit zero再嚟到M記。