為了實現媽媽遺願，我成為了女兒國唐僧: K302

Q：「金字邊一個白字，就係讀鉑。」
「係呀，呢個係我哋嘅PT950婚戒系列，上面粒鑽石可以根據客人挑選，或者自攜寶石嚟畀我哋師傅鑲嵌都得…」
Q：「嗯…而家啲鉑金真係平咗好多。」
「係呀，大概只係得返黃金嘅一半，所以相對上嚟講而家買鉑金首飾係會抵啲，至少心理上嚟講，以前係貴好多，或者小姐可以考慮下？」
先唔理佢係咪嚟混吉，我真係成個頭都係問號。
我：「妳可唔可以話我知鉑金同白金有乜分別先？」
Q：「金係元素，銀係元素，鉑係元素，白金係用金加其他金屬溝出嚟嘅alloy，而嚴格嚟講除咗千足金飾之外，其他所有首飾金屬都係alloy，因為純元素實在太軟，唔禁用亦都好難成形，所以就算銀好平都好，你都只會見到925銀飾，係為咗提高硬度，而唔係慳你嗰七點五%銀…」
「嘩，小姐妳實在係非常專業！」
Q：「呢條友真係麻鬼煩，阻住晒我睇啲咁靚嘅嘢。」
我：「咁都係得個知字啫…」




Q：「哼，求知慾咁強就返去溫periodic table啦！」
「咁…小姐有無需要趁低吸納返一啲PT950首飾呢？」
Q：「呀，我想問下有無Snoopy首飾嘅現貨睇？」攪咗咁耐，終於知道佢係嚟睇啲咁可愛嘅嘢…
「有呀，過嚟呢邊吖。」店員姐姐攞咗一版史露髀嘅首飾出嚟，而我就跟住QQ坐低喺前面睇。
有頸鏈、手鏈、串飾、金幣…甚至係手繩。
我：「原來Zilvia鍾意Snoopy㗎？」
Q：「有乜出奇呀，人哋養狗㗎，重話如果俾佢重新改一次名會叫佢Snoopy就算，佢就可以做Lucy。」
我：「佢隻狗大到咁有邊忽似史露髀？」
Q：「哎吔，你有乜資格質疑人哋嘅品味呀，你自己咪又係亂咁嚟…睇下，嗰粒純金Woodstock charm好得意呀，金閃閃襯返晒原本黃黚黚嘅雀仔，成堆坐喺架車仔入面個樣好傻。」呢個港女係咪喺度扮緊天真可愛？可疑…
「小姐係咪鍾意呀，呢粒做緊特價千三多啲，可以穿入頸鏈度襯下㗎。」姐姐繼續唔放過小妹妹。




Q：「唔使喇，妳哋抹首飾辛苦…想問下有無呢隻呀？」
「呢隻…等等呀，我去check一下先。」佢行開前就收返盤首飾先，剩返一粒胡士托喺枱面，認真居心叵測。
我：「乜妳真係鍾意隻雀仔㗎？」無知如我都知黃金係貴過銀好多，比起潘朵拉嘅串珠前面多咗粒一字。
Q：「無乜特別，但閃閃爧嘅嘢就係女仔都鍾意㗎啦。」
我：「呢度會唔會有Kuromi系列㗎？」